गोरखा, २१ भदौ ।
गोरखाको चुमनुव्री गाउँपालिका–४ नाम्रुङ खोलामा आएको बाढीले चार घरमा क्षति पुर्याउनुका साथै दुई वटा फलामे पुल बगाएको छ ।
जिल्ला प्रहरी कार्यालय गोरखाका डिएसपी राजकुमार श्रेष्ठका अनुसार आज बिहान आएको बाढीले चुमनुव्री–४ का उर्गीन लामा र नगुछिरिङ लामाको घर बगाएको छ । त्यस्तै लाक्पाभुटी लामा र दोर्जे लामाको घरमा पनि बाढीले क्षति पुर्याएको छ ।
बाढीले चुमनुव्री–४ र २ जोड्ने फलामे पुलसमेत बगाएको डिएसपी श्रेष्ठले बताए । नाम्रुङ हुँदै ल्हो जाने अर्को फलामे पुल पनि बाढीले बगाएको प्रहरीले जनाएको छ ।
बाढीबाट मानवीय क्षति भने नभएको प्रहरीले जनाएको छ ।
बुढीगण्डकी नदीमा मिसिने नाम्रुङ खोलामा बाढी आएपछि तटीय क्षेत्रमा सतर्कता अपनाउन प्रहरीले आग्रह गरेको छ । नदी किनार तथा तटीय क्षेत्रमा नजान प्रहरीले सार्वजनिक सूचनामार्फत आग्रह गरेको हो ।
