अमेरिकी राष्ट्रपति डोनाल्ड ट्रम्पको कडा चेतावनी र पाकिस्तानको मध्यस्थतापछि इरानसँग भएको युद्धविरामलाई विश्व समुदायले स्वागत गरेको भए पनि यसको स्थायित्वप्रति प्रमुख शक्ति राष्ट्रहरूले गम्भीर आशंका व्यक्त गरेका छन् । विशेषतः इजरायलले सैन्य कारबाहीलाई निरन्तरता दिने अडान कायम राखेपछि सहमति कार्यान्वयनमै चुनौती देखिएको छ ।
युरोपेली संघकी विदेश नीति प्रमुख काजा कल्लास र फ्रान्सका राष्ट्रपति इमानुयल म्याक्रोनले लेबनानमा जारी आक्रमणको सन्दर्भ उल्लेख गर्दै उक्त युद्धविरामको विश्वसनीयता र दीर्घकालीन प्रभावमाथि प्रश्न उठाउनुभएको छ ।
आर्थिक क्षेत्रमा पनि द्वन्द्वको असर गहिरिँदै गएको देखिन्छ । अन्तर्राष्ट्रिय मुद्रा कोष (IMF) की प्रमुख Kristalina Georgieva ले युद्धविराम भए पनि विश्व अर्थतन्त्रमा दीर्घकालीन ‘घाउ’ रहने र पुरानै लयमा फर्किन कठिन हुने चेतावनी दिनुभएको छ ।
यता स्पेनले तेहरानस्थित दूतावास पुनः सञ्चालन गर्ने घोषणा गर्दै अमेरिकी र इजरायली कदमप्रति आलोचना जनाएको छ । साउदी अरब र कतारलगायत खाडी मुलुकहरूले युद्धविरामलाई सकारात्मक संकेतका रूपमा लिए पनि इजरायलको आक्रामक रणनीति र युरोपेली असन्तुष्टिका कारण पश्चिम एसियाको राजनीतिक अवस्था अझै अनिश्चित र संवेदनशील रहने देखिएको छ ।
