काठमाडौं, २३ पुस ।
नेपाली कांग्रेसका महामन्त्री गगन थापा र विश्वप्रकाश शर्माले आगामी पुस २७ र २८ गते काठमाडौंको भृकुटीमण्डपमा पार्टीको विशेष महाधिवेशन आह्वान गरेका छन् ।
महामन्त्रीद्वयले जारी गरेको वक्तव्यमा उल्लेख छ कि ५४ प्रतिशत महाधिवेशन प्रतिनिधिले महाधिवेशन माग गरेको दाबी गरिएको छ । उनीहरूले भने, “विधानबमोजिम कारणसहित माग गरिएको महाधिवेशनलाई असान्दर्भिक वा औचित्यहीन भन्ने अधिकार विधानले कसैलाई दिएको छैन ।”
केन्द्रीय कार्यसमितिले पनि महाधिवेशन आह्वान गर्न प्रयास गरेको भए तापनि सम्भव नभएको र यस अवस्थामा विधानसम्मत माग बेवारिसे हुन नहुने उल्लेख गरिएको छ । वक्तव्यमा भनिएको छ, “महाधिवेशन आफैँ क्रियाशील हुन्छ ।”
तर पार्टीको केन्द्रीय कार्यालयका मुख्यसचिव कृष्णप्रसाद पौडेलले जारी गरेको विज्ञप्तिमा भने विशेष महाधिवेशनलाई विधानविपरीत करार गरिएको छ ।
विज्ञप्तिमा भनिएको छ:
“पार्टीको विधानअनुसार कुनै पनि तहको अधिवेशन वा विशेष महाधिवेशन बोलाउने अधिकार व्यक्तिगत रूपमा पार्टीका पदाधिकारी वा सदस्यलाई नभई केवल केन्द्रीय कार्यसमितिलाई मात्र छ । त्यसैले व्यक्तिगत रूपमा बोलाइएको महाधिवेशन वा विशेष महाधिवेशनका नाममा हुने गतिविधि पार्टीको विधानविपरीत हुनेछ । यस प्रकारका गतिविधिमा संलग्न नहुन सबै तहका पदाधिकारी, सदस्य, महासमिति सदस्य, महाधिवेशन प्रतिनिधि, भ्रातृ र शुभेच्छुक संस्था तथा विदेशस्थित नेपाली जनसम्पर्क समितिका पदाधिकारी एवं सदस्यहरूलाई नेपाली कांग्रेस हार्दिक अपील गर्दछ ।”
