मकवानपुर, १३ चैत ।
मकवानपुरको बकैया गाउँपालिकामा कारको ठक्करबाट घाइते भएका १ जनाको मृत्यु भएको छ ।
सोमबार दिउँसो बकैया ४ गोठखोला स्थित धरान-चतरा सडक खण्डमा हात्तिसुडेबाट गरगरेतर्फ आउँदै गरेको प्रदेश ३-०१-०२४ च १७९६ नम्बरको कारले गरगरेबाट हात्तिसुडेतर्फ जाँदै गरेको साइकललाई ठक्कर दिएको थियो ।
कारको ठक्करबाट साईकल यात्री बकैया ४ का निर्जल बानियाको छोरा ११ वर्षीय निशान बानिया घाइते भएको उपचारको क्रममा मृत्यु भएको जिल्ला प्रहरी कार्यालय मकवानपुरले जनाएको छ । कारले ठक्कर दिदा घाइते भएका निशानलाई उपचारको लागि हेटौंडा अस्पताल ल्याइएकोमा उपचारको क्रममा सोमबार नै मृत्युु भएको हो ।
प्रहरीले कार चालक चितवन भरतपुर महानगरपालिका १० का ३५ वर्षीय शारदा सुवेदीलाई नियन्त्रणमा लिएको जनाएको छ ।
