कलैया, १२ फागुन ।
प्रहरीको गोली लागेर बारामा एक गाँजा तस्करको मृत्यु भएको छ । गएराति सात–आठ जनाको समूहले गाँजा तस्करी गरिहेको सूचना पाएपछि प्रहरीको टोली गस्तीमा गएको थियो ।
सिम्रौनगढ नगरपालिका–२ महुयाहीमा तस्कर समूहले गस्ती टोलीमाथि एक राउन्ड गोली चलाएपछि आत्मरक्षाका लागि जवाफी फायरिङ गर्दा एक भारतीय नागरिकको मृत्यु भएको प्रहरीले जनाएको छ । उनको पहिचान भने खुलिसकेको छैन ।
प्रहरीले हानेको गोली ती व्यक्तिको कम्मरमा लागेको थियो । उनलाई उपचारका लागि कलैया अस्पताल ल्याएकोमा राति मृत्यु भएको प्रहरी प्रवक्ता राजेश थापाले जानकारी दिए ।
तस्कर समूहका एक जना पक्राउ परेका छन् । पक्राउ पर्नेमा भारत विहार मोतिहारी जिल्ला ग्राम पञ्चायत पिप्रा निवासी ४० वर्षीय हृदेश गिरी रहेका छन् ।रासस
