काठमाडौँ, २३ भदौ ।
सरकारले प्रमुख प्रतिपक्षी दल नेकपा एमालेको अवरोधकाबीच राजनीतिक दलसम्बन्धी अध्यादेश प्रतिनिधिसभामा पेश गरेको छ । प्रतिनिधिसभाको बुधबार बसेको तेस्रो बैठकमा गृहमन्त्री बालकृष्ण खाँणले अध्यादेश पेश गरेका हुन् ।
एमाले सांसदहरूले नाराबाजी गरिरहेकै बेला सभामुखले गृहमन्त्री खाँणलाई अध्यादेश पेश गर्न समय दिएका थिए । गृहमन्त्रीले अध्यादेश पेश गरेपछि सभामुख अग्निप्रसाद सापकोटाले प्रतिनिधिसभाको बैठक २५ गतेसम्मका लागि स्थगित गरेका छन् ।
यसअघिका दुई बैठकमा पनि एमाले सांसदहरुले नाराबाजी गरेर अवरोध पुर्याएका थिए । पहिलो बैठक असन्तुष्ट दलसँग छलफलका लागि १५ मिनेटका लागि स्थगित गरिएको थियो ।
एमाले संसदीय दलका प्रमुख सचेतक विशाल भट्टराई र सचेतक शान्ता चौधरीसँगको छलफलमा सहमति नजुटेपछि सभामुख सापकोटाले दोस्रो बैठक सञ्चालन गरेका थिए । एमालेले रोस्टम अगाडि नाराबाजी कायम राखे पनि सापकोटाले सभामुख तथा उपसभामुखको अनुपस्थितिमा बैठकका अध्यक्षता गर्नका लागि सांसदहरूको नाम मनोनयन गरेको पढेर सुनाएका थिए । जसमा चन्द्रकान्त चौधरी, मानबहादुर विश्वकर्मा, राधाकुमारी ज्ञवाली, रेणुकुमारी यादव, लालबाबु पण्डित, सत्य पहाडी, सरलाकुमारी यादव रहेका छन् ।
एमालेले पार्टीले कारबाहीका लागि सिफारिस गरेका १४ जना सांसदलाई कारबाही नगरेको र दल विभाजनमा भूमिका खेलेको भन्दै सदनमा विरोध जनाएको हो । पहिलो बैठकमा बोल्दै प्रमुख सतेचक भट्टराईले विगतमा अन्य दलका कारबाहीको सिफारिसलाई तत्कालै सूचना प्रकाशन गरिएको तर एमालेको सिफारिसलाई विचाराधीनमा राखेर दल विभाजन भइसकेपछि कारबाही गर्न नपर्ने निर्णय गरेको भन्दै सदनको कारबाही चल्न नदिने घोषणा गरेका थिए ।
सांसदहरूले नाराबाजी गर्दे विधिको शासन कायम गर्न तथा संसदीय सर्वोच्चता कायम गर्न माग गरेका थिए । सभामुख सापकोटाले मुलुकको संविधान र कानुन तथा संसद्को मर्यादा र परम्पराभन्दा बाहिर नजान आग्रह गर्दै आफूले प्रतिनिधिसभाको नियमावलीबमोजिम नै काम गरेको जिकिर गरे । भट्टराईले एमालेको तर्फबाट सभामुखको जवाफ मागेका थिए । त्यसपछि सापकोटाले जवाफ सुरु गरे पनि एमाले सांसदहरूले रोस्ट्रम अगाडि नाराबाजी गरेका थिए ।
