कीर्तिपुर । नेपाल प्रिमियर लिग (एनपीएल) अन्तर्गत मंगलबार भएको खेलमा सुदूरपश्चिम रोयल्सले जनकपुर बोल्ट्सलाई २७ रनले पराजित गरेको छ । सुदूरपश्चिमले दिएको १२१ रनको लक्ष्य पछ्याएको जनकपुर १९.५ ओभरमा ९३ रनमा समेटिएको थियो ।
९४ रनमै १० विकेट गुमाएको जनकपुरका लागि त्रितराज दासले सर्वाधिक २१ रन बनाए । उनले २९ बलमा १ छक्का प्रहार गरे । जेम्स निसमले २५ बलमा १ चौका र १ छक्कासहित २० रन बनाए । आदित्य महतोले ११ बलमा १० रन जोड्दा राहुल यादवले ६ बलमा ११ रन बनाए ।
अन्य ब्याटरले भने दोहोरो अंकमा रन बनाउन सकेनन् । रायन बर्लले १४ बलमा ८, ललित राजवंशीले ९ बलमा अविजित ५, कप्तान हरमित सिंहले ८ बलमा ४, अनिल साहले ५ बलमा २, विशाल शुस्लिङले २ बलमा २, अभिषेक तिवारीले ६ बलमा २ र ह्यारी टेक्टरले ४ बलमा १ रन बनाए । आदित्य महतोले पनि १० रन जोडेका थिए ।
जनकपुरको ब्याटिङ सुरुदेखि नै दबाबमा परेको थियो । टोलीले पावरप्लेमा ३ विकेट गुमाएर २८ रन मात्रै बनाएको थियो । ४.४ ओभरमा ह्यारी टेक्टर आउट हुँदा जनकपुरको स्कोर २५ रन थियो । ९.५ ओभरमा रायन बर्ल आउट हुँदा टोलीले ४२ रन बनाएको थियो ।
त्यसपछि पनि विकेट पतन रोकिएन । १२.३ ओभरमा जनकपुरले ५० रन पूरा गर्दा ५ विकेट गुमाइसकेको थियो । जेम्स निसमले केही समय इनिङ्स सम्हाल्ने प्रयास गरे पनि टोलीलाई जितसम्म पुर्याउन सकेनन् ।
सुदूरपश्चिमका स्कट कुगेलेइनले सर्वाधिक ३ विकेट लिए । उनले ४ ओभरमा १३ रन खर्चिए । थारिन्दु रत्नायकेले ४ ओभरमा १२ रन दिएर १ विकेट लिए । हेमन्त धामी, कप्तान दीपेन्द्रसिंह ऐरी, अनिल खरेल र इशान पाण्डेले समान १ विकेट हात पारे ।
यसअघि टस जितेर पहिले ब्याटिङ गरेको सुदूरपश्चिमले निर्धारित २० ओभरमा ९ विकेट गुमाएर १२० रन बनाएको थियो ।
सुदूरपश्चिमका लागि ब्रान्डन म्याकमुलेनले सर्वाधिक ३३ रन बनाए । उनले २३ बलमा २ चौका र २ छक्का प्रहार गरे । थारिन्दु रत्नायके २८ बलमा २७ रन बनाउँदै अविजित रहे । आरिफ शेखले १६ बलमा ११ रन बनाए भने साइफ जैब र विनोद भण्डारीले समान १० रन जोडे ।
जनकपुरका हरमित सिंहले ४ ओभरमा १७ रन खर्चेर ४ विकेट लिए । ह्यारी टेक्टर, राहुल यादव, आदित्य महतो र अभिषेक तिवारीले समान १ विकेट लिए ।
सुदूरपश्चिम ६ खेलबाट ८ अंक जोड्दै दोस्रो स्थानमा उक्लिएको छ । जनकपुर भने ४ अंकसहित पाँचौँ स्थानमा छ ।
