काठमाडौं । नेपाल प्रिमियर लिग (एनपीएल) अन्तर्गत शुक्रबारको खेलमा चितवन राइनोजले पोखरा एभेन्जर्सलाई ३० रनले पराजित गरेको छ । त्रिवि अन्तर्राष्ट्रिय क्रिकेट मैदान कीर्तिपुरमा भएको खेलमा १५२ रनको लक्ष्य पछ्याएको पोखरा १९ ओभरमा १२१ रनमा अलआउट भएपछि चितवनले प्रतियोगितामा दोस्रो जित दर्ता गरेको हो ।
१५२ रनको लक्ष्य पछ्याएको पोखराले सुरुवातदेखि नै नियमित अन्तरालमा विकेट गुमायो । कप्तान कुशल भुर्तेल पहिलो ओभरमै चार रन बनाएर आउट भए । युवराज समराले १४ बलमा १९ रन बनाए पनि पोखराको इनिङ्सलाई गति दिन सकेनन् ।
ओपनर अर्जुन कुमालले एकतर्फबाट संघर्ष गर्दै ४४ बलमा ४५ रन बनाए । उनले तीन चौका र एक छक्का प्रहार गरे । तर उनलाई अन्य ब्याटरबाट पर्याप्त साथ मिलेन ।
पोखराका अन्य ब्याटरले ठूलो साझेदारी गर्न नसक्दा टोली १९ ओभरमै १२१ रनमा समेटियो ।
चितवनका बलरमध्ये कमलसिंह ऐरीले दुई ओभरमा सात रन खर्चेर तीन विकेट लिए । रिजन ढकालले २४ रन दिँदै चार विकेट झारे । उनी प्लेयर अफ दि म्याच समेत घोषित भए । त्यस्तै, दान माउस्ले, मौसम ढकाल र कुशल मल्लले समान एक विकेट लिए ।
यसअघि टस जितेर पहिले बलिङ रोजेको पोखराविरुद्ध चितवनले निर्धारित २० ओभरमा ६ विकेट गुमाउँदै १५१ रन बनाएको थियो ।
चितवनका लागि सिकन्दर राजाले आक्रामक १६ बलमा ३७ रन बनाए । उनले दुई चौका र चार छक्का प्रहार गरे । रवि बोपाराले २८ बलमा ३५ रनको योगदान दिए । पाँचौँ विकेटका लागि राजा र बोपाराबीच ६० रनको साझेदारी भएको थियो ।
यसअघि ओपनर अर्जुन साउद र डेभिड मलानले पहिलो विकेटका लागि ६० रनको साझेदारी गरेका थिए । साउदले २७ बलमा ३१ तथा मलानले २८ बलमा २८ रन बनाए ।
पोखराका बिपिन खत्री, चमिका करुणारत्ने र कुशल भुर्तेलले समान दुई विकेट लिए ।
जितपछि चितवनले २ अंक बटुलेको छ । चार खेल खेलेको उसले दुई खेलमा जित, एक खेलमा हार र एक खेल बराबरी खेलेको छ। पोखरा विरुद्धको खेलपछि चितवन ५ अङ्कमा तालिकाको तेस्रो स्थानमा उक्लिएको छ।
चार खेल खेलेको पोखराले भने अझै पनि पहिलो जित निकाल्न बाँकी छ। बिना कुनै अङ्क पोखरा तालिकाको पुछारमा रहेको छ।
