चितवन, २५ चैत ।
भरतपुर अस्पतालको ७०औँ वार्षिकोत्सवका अवसरमा ल्याब टेक्निसियन विष्णुप्रसाद बास्तोलालाई उत्कृष्ट कर्मचारीका रूपमा सम्मान गरिएको छ ।
अस्पतालमा कार्यरत बास्तोलालाई उनको कार्यकुशलता, जिम्मेवारीपूर्ण सेवा र उच्च व्यावसायिक क्षमताका आधारमा उत्कृष्ट कर्मचारी छनोट गरिएको हो । उनलाई अस्पताल विकास समितिका अध्यक्ष ढुण्डीराज पौडेल र जिल्ला समन्वय समिति चितवनका प्रमुख नारायणप्रसाद अधिकारीले संयुक्त रूपमा दोसल्ला ओढाई प्रमाणपत्र प्रदान गरेका थिए ।
सरल, सहयोगी र आत्मीय स्वभावका रूपमा परिचित बास्तोलाले अस्पतालको रक्तसञ्चार (ब्लड बैंक) सेवाको सुधार र व्यवस्थापनमा उल्लेखनीय योगदान पुर्याउँदै आएका छन् ।
वार्षिकोत्सव कार्यक्रममा अस्पतालको सेवा विस्तार, गुणस्तर सुधार तथा आगामी स्वास्थ्य योजनाबारे समेत छलफल गरिएको अस्पताल प्रशासनले जनाएको छ ।
