चितवन, २६ माघ
नारायणगढमा प्रधान कार्यालय रहेको हंस बहुउद्देश्यीय सहकारी संस्था लिमिटेडको सेवा प्रवाहलाई अझ गुणस्तरीय, प्रभावकारी तथा सदस्यमैत्री बनाउने उद्देश्यले आयोजना गरिएको संस्थागत क्षमता अभिवृद्धि तथा अध्ययन अवलोकन कार्यक्रम माघ २३ र २४ गते सम्पन्न भएको छ ।
दुई दिने उक्त कार्यक्रममा संस्थाका सञ्चालक समिति, लेखा सुपरिवेक्षण समिति, विभिन्न उपसमिति तथा कर्मचारीहरूको सक्रिय सहभागिता रहेको थियो । कार्यक्रममा जम्मा ३८ जनाको सहभागिता रहेकोमा १९ जना कर्मचारी सहभागी थिए ।
कार्यक्रमअन्तर्गत माडी–बसन्तपुरस्थित माडी बहुउद्देश्यीय सहकारी संस्था लिमिटेडको अध्ययन अवलोकन गरिएको थियो । सो अवसरमा त्यहाँको संस्थागत कार्यप्रणाली, सेवा प्रवाह, व्यवस्थापन प्रणालीलगायत विषयमा प्रस्तुति तथा अन्तरक्रिया गरिएको थियो ।
यसैगरी अयोध्या राम–जानकी मन्दिरमा दर्शन, सोमेश्वर गढीस्थित कालिका मन्दिर, शनि मन्दिर, माडी भ्यू टावर, ठोरी क्षेत्र, नेपाल–भारत सीमा क्षेत्र, कृषि फर्मलगायत धार्मिक, पर्यटकीय तथा भौगोलिक महत्वका स्थानहरूको अवलोकन गरिएको थियो ।
कार्यक्रमकै क्रममा माडी भ्यू सामुदायिक होमस्टेमा सञ्चालक समिति, उपसमिति तथा कर्मचारीहरूको संयुक्त बैठक सम्पन्न भएको थियो । बैठकमा संस्थालाई आगामी दिनमा थप मजबुत, दिगो र प्रभावकारी रूपमा अगाडि बढाउने विषयमा रणनीतिक छलफल गरिएको थियो । सहभागीहरूले संस्थागत सुशासन, सेवा विस्तार, सदस्य सन्तुष्टि तथा आन्तरिक समन्वयलाई अझ सुदृढ बनाउँदै लैजानुपर्नेमा जोड दिएका थिए ।
अध्ययन, अवलोकन तथा अन्तरक्रियाबाट प्राप्त अनुभव, उपलब्धि र सुझावहरूमाथि सामूहिक छलफल गर्दै दुई दिने संस्थागत क्षमता अभिवृद्धि, अध्ययन अवलोकन तथा पुनर्ताजगीकरण कार्यक्रम सफलतापूर्वक सम्पन्न भएको संस्थाले जनाएको छ ।
कार्यक्रमबारे धारणा राख्दै संस्थाका अध्यक्ष दिनेश कुमार चुकेले यस्ता कार्यक्रमले नेतृत्व तह र कर्मचारीबीचको समझदारी बढाउने, संस्थागत सोचलाई फराकिलो बनाउने तथा सहकारीलाई अझ सक्षम बनाउँदै लैजान महत्वपूर्ण भूमिका खेल्ने बताए । उनले प्राप्त सिकाइ र अनुभवलाई व्यवहारमा उतार्दै संस्थालाई थप मजबुत बनाइने प्रतिबद्धता व्यक्त गरे ।
त्यसैगरी कार्यक्रमका सञ्चालक तथा संस्थाका प्रबन्धक नारायणप्रसाद सापकोटाले अध्ययन अवलोकन, छलफल र सामूहिक सहभागिताले कर्मचारी तथा नेतृत्व तहमा नयाँ ऊर्जा, ज्ञान र उत्साह थपिएको उल्लेख गरे । उनले प्राप्त सुझाव र अनुभवलाई संस्थाको भावी योजना तथा कार्यदिशामा उपयोग गरिने बताए ।
