देवघाटधाम, ७ फागुन ।
संसारकै पवित्रतम कालीगण्डकी नदीको अध्ययन, अनुसन्धान, प्रचार-प्रसार तथा मानवीय अतिक्रमण, दोहनका विरुद्धमा अभियानरत अभियानकर्मीहरूलाई महेश सन्न्यास आश्रमद्वारा सञ्चालित रामानन्द अनुसन्धान केन्द्रद्वारा प्रदान गरिने ईश्वरी जनकदेव पुरस्कारले सम्मान गरेको छ । बुधबार देवघाट महेश सन्न्यास आश्रममा रामानन्द अनुसन्धान केन्द्रद्वारा आयोजित कालीगण्डकी विमर्श सभामा सो पुरस्कार प्रदान गरिएको थियो ।
सम्मानित व्यक्तिहरू :
श्री कुलराज चालिसे
संसारकै पवित्रतम कालीगण्डकी नदी र त्यसको प्रस्रवण क्षेत्रमा प्रवर्धित समृद्ध गण्डकी सभ्यताको गहन अध्ययन अनुसन्धान गरी प्रचार-प्रसार गर्ने कार्यमा व्यक्तिगत तथा सामूहिक रूपमा पुऱ्याएको योगदानको उच्च प्रशंसा गर्दै उक्त पुरस्कार प्रदान गरिएको हो ।
श्री जगन्नाथ रेग्मी
संसारभरका सनातनी हिन्दुहरूको जीवन्त सांस्कृतिक सम्पत्ति गण्डकी सभ्यताको वैदिक एवं पौराणिक अध्ययन अनुसन्धान गरी जनआस्था प्रवर्धन गर्ने कार्यमा महत्त्वपूर्ण प्राज्ञिक योगदान पुऱ्याउनु भएकोमा उच्च प्रशंसा गर्दै उक्त पुरस्कार प्रदान गरिएको हो ।
श्री रामचन्द्र बराल
सनातन चेतनाका अजस्र स्रोत हिमशृङ्खलाबाट प्रवाहित गण्डकीका किनारमा संवर्धित धर्म, संस्कार र चेतनाको अध्ययन अनुसन्धानमा देखाउनुभएको योगदानको प्रशंसा गर्दै उक्त पुरस्कार प्रदान गरिएको हो ।
श्री आर. के. अदीप्त गिरी
पवित्र कालीगण्डकी नदीमा हुने गरेका मानवीय अतिक्रमण र दोहनलाई रोकथाम गर्न व्यक्तिगत तथा सामूहिक रूपमा अभियान सञ्चालन गरी पुऱ्याउनु भएको महत्त्वपूर्ण योगदानको प्रशंसा गर्दै उक्त पुरस्कार प्रदान गरिएको हो ।
श्री रचना भट्टराई
शालग्रामबाहिनी कृष्णागण्डकी नदीको पवित्र जल तथा शालग्रामको महत्त्व र सौन्दर्य प्रचारप्रसार गरी धार्मिक पर्यटनको प्रवर्धनमा व्यक्तिगत तथा संस्थागत रूपमा पुऱ्याउनु भएको महत्त्वपूर्ण योगदानको प्रशंसा गर्दै उक्त पुरस्कार प्रदान गरिएको हो ।
