भरतपुर, ६ असोज ।
नेकपा (एकीकृत समाजवादी)का महासचिव चयन गरिने भएको छ ।
भोलि पुनः बस्ने केन्द्रीय कमिटीको बैठकमा महासचिव चयन गरिने पार्टी प्रचार विभाग प्रमुख जगन्नाथ खतिवडाले जानकारी दिए ।
आज नयाँ बानेश्वरस्थित अर्पण ब्यांक्वेटमा बसेको बैठकमा महासचिव चयनलगायत विषयमा छलफल भएको हो । बैठकबाट राजनीतिक प्रतिवेदन पारित गरिएको छ । हिजोको बैठकमा अध्यक्ष माधवकुमार नेपालले राजनीतिक प्रतिवेदन प्रस्तुत गरेका थिए ।
उक्त प्रतिवेदनमाथि विभिन्न पाँच समूह बनाएर छलफल गरिएको थियो । केन्द्रीय कमिटी सदस्यहरूले विभिन्न सुझावहरू दिएका थिए ।
भोलि बिहान ११ बजे अर्पण ब्यांक्वेटमै केन्द्रीय कमिटीको बैठक बस्ने खतिवडाले बताए । बैठकमा केन्द्रीय कमिटी विस्तार, नेताहरूको जिम्मेवारी बाँडफाँडलगायत विषयमा छलफल हुने उनले जानकारी दिए ।
