भरतपुर, २७ साउन ।
अभिनेता पल शाहले अभिनय गरेको तीज गीत ‘यस्तै हो संसार’ बोलको गीत सार्वजनिक भएको छ । पछिल्लो समय म्युजिक भिडियोमा व्यस्त रहेका पल अहिले तीज गीतमा समेत देखिन थालेका छन् ।
नेत्र अर्यालको शब्द रहेको यस गीतमा गायक खेम सेन्चुरी र गायिका अनिता चलाउनेले स्वर भरेका छन् । गीतमा संगीत भने खेम सेन्चुरीको नै रहेको छ ।
गीतको भिडियोमा पल शाहका साथै दुर्गेश थापा, वर्षा राउत र अन्जली अधिकारीको अभिनय देख्न सकिन्छ ।
पलले केही दिनअघि रिलिज भएको दुर्गेश थापाको तीज गीत ‘बीच्च बीच्चमा-५’मा समेत अभिनय गरेका थिए ।
नवराज उप्रेतीको छायाँकन रहेको भिडियोमा गम्भिर बिष्टको कोरियोग्राफी र निर्देशन रहेको छ । साथै, भिडियोको सम्पादन विष्णु शर्माले गरेका हुन् ।
गत वर्ष खेम सेन्चुरीको तीज गीत ‘सोचेझै जिन्दगी रैनछ’ले निकै चर्चा बटुलेको थियो ।
