काठमाडौं, ६ भदौ ।
सरकारले सामाजिक सञ्जाल ‘टिकटक’मा लगाएको प्रतिबन्ध हटाउने निर्णय गरेको छ ।
मन्त्रिपरिषद्को बिहीबार बसेको बैठकले टिकटक खुला गर्ने निर्णय गरेको सञ्चार तथा सूचना प्रविधिमन्त्री एवं सरकारका प्रवक्ता पृथ्वीसुब्बा गुरुङले बताए । केही सर्त सहित टिकटक खुला गर्ने निर्णय भएका उनले बताए ।
टिकटकले नेपालको पर्यटन प्रबर्द्धनमा सघाउनुपर्ने, विद्युतीय साक्षरतामा सघाउनुपर्ने, सार्वजनिक शिक्षालाई गुणस्तरीय बनाउन सघाउनुपर्ने र कन्टेन्टको भाषामा ध्यान दिनुपर्ने सर्त राखेको छ ।
प्रवक्ता गुरुङले भने, ”हामीले यी सर्तहरु राख्दा टिकटकले स्वीकार गर्ने भएपछि अहिलेलाई नीतिगत रुपमा टिकटक खुला गरेका छौं।” यसका आधारमा टिकटकले सरकारसँग सम्झौता गरेपछि सञ्चालन गर्न दिइने प्रवक्ता गुरुङले बताए ।
टिकटकको प्रयोगले विकृति बढाएको भन्दै पुष्पकमल दाहाल नेतृत्वको सरकारले गत कात्तिक २७ मा टिकटकमाथि प्रतिबन्ध लगाएको थियो । त्यतिवेला सरकारको चर्को आलोचना भएको थियो ।
