काठमाडौं, २५ असार ।
अमेरिका, क्यानडा र मेक्सिकोमा जारी २०२६ फिफा विश्वकपले फुटबल समर्थकलाई अविस्मरणीय रोमाञ्च प्रदान गरिरहेको छ । ४८ टोली सहभागी भएको पहिलो विश्वकपले क्वाटरफाइनलअघि नै गोल, नाटकीय पुनरागमन र अन्तिम मिनेटका निर्णायक क्षणमार्फत इतिहासका धेरै कीर्तिमान आफ्नो नाममा लेखाइसकेको छ ।
प्रतियोगिताका ९६ खेल सम्पन्न हुँदा २८० गोल भइसकेका छन्, अर्थात् प्रतिखेल औसत २.९२ गोल। यो १९७० यताकै सबैभन्दा उच्च गोल औसत हो । कुल गोलमध्ये ७४.६ प्रतिशत गोल ‘ओपन प्ले’बाट भएका छन्, जसले आक्रामक फुटबलको प्रभावलाई झनै स्पष्ट बनाएको छ ।
यस विश्वकपको अर्को विशेषता अन्तिम मिनेटको रोमाञ्च हो । नकआउट चरणका २४ खेलमध्ये आठ खेलमा ८५औँ मिनेटपछि निर्णायक गोल भएका छन् । इजिप्टविरुद्ध इन्जो फर्नान्डेजले ९०औँ मिनेटपछि गरेको गोल यस संस्करणको १०औँ अन्तिम समयमा भएको निर्णायक गोल बनेर नयाँ कीर्तिमान कायम गरेको छ ।
पुनरागमनका कथाले पनि प्रतियोगितालाई विशेष बनाएका छन् । बेल्जियमले सेनेगलविरुद्ध र अर्जेन्टिनाले इजिप्टविरुद्ध दुई–दुई गोलले पछि परेको अवस्था उल्टाउँदै ३–२ को रोमाञ्चक जित निकाले । त्यस्तै, १० खेलाडीमा सीमित इङ्गल्याण्डले घरेलु समर्थकमाझ मेक्सिकोलाई ३–२ ले हराउँदै सबैलाई चकित बनायो ।
व्यक्तिगत प्रदर्शनतर्फ गोल्डेन बुटको प्रतिस्पर्धा पनि निकै रोचक बनेको छ । लियोनेल मेस्सी आठ गोलसहित शीर्ष स्थानमा छन् भने किलियन एम्बाप्पे र अर्लिङ हालान्ड सात–सात गोलसहित पछ्याइरहेका छन् । ह्यारी केनले पनि छ गोल गर्दै प्रतिस्पर्धालाई खुला राखेका छन् ।
गोलको वर्षा, अप्रत्याशित नतिजा, अन्तिम मिनेटको नाटकीयता र स्टार खेलाडीहरूको उत्कृष्ट प्रदर्शनका कारण २०२६ को फिफा विश्वकपलाई धेरैले इतिहासकै सबैभन्दा मनोरञ्जक संस्करणका रूपमा लिन थालेका छन् । अब बाँकी रहेका क्वाटरफाइनलदेखि फाइनलसम्मका खेलले यही रोमाञ्च कायम राख्न सके, यो विश्वकपलाई फुटबल इतिहासकै उत्कृष्ट प्रतियोगितामध्ये एक मानिने आधार अझ बलियो बन्नेछ ।
