लेखराम सापकोटा
भरतपुर, २५ जेठ
नारायणगढ बजारको सडक किनार तथा ढल सफाइले तीव्रता पाएको छ । लकडाउनका कारण सडक सफाइको गतिविधि बन्द हुँदा नारायणगढको सडक फोहोर देखिनुका साथै घाँसे मैदान जस्तै बनेको थियो । कायाकैरन डटकमकले यसबारेमा पटकपटक समाचार प्रकाशन गरिरहेको थियो ।
अहिले सडक किनारको सफाइ सँगसँगै बजारभरीको ढल सफाइ गर्ने कार्य एकैपटक अगाडि बढाइएको छ । सडक किनारमा उम्रेका घाँस, जथाभावी फालिएका फोहोर सँगसँगै सडकको दुबै किनारका ढलहरू सरसफाइ थालिएको छ ।
गत चैत ११ गतेदेखि लकडाउन आह्वान भएपछि बजार क्षेत्रको सरसफाइ पनि रोकिएको थियो । अत्यावश्यक सेवाअन्तर्गतका व्यवसायीले आफ्नो पसलबाट निस्कने फोहोर सोझै सडक छेउमा मिल्काउँथे ।
हावाहुरीका कारण पनि उडेर आउने फोहोर सडकभरी हुन्थ्यो । जसले गर्दा पछिल्लोसमय नारायणगढ बजारको सुन्दरतामा ह्रास आएको थियो । बजारको सरसफाइ थालिएपछि नारायणगढबासी खुसी देखिएका छन् ।
साथै बजारका बिग्रे भत्केका सडकपेटीको मर्मत कार्य पनि भैरहेको छ । आनन्दमार्ग, बेल्चोक, लायन्सचोक, बालकुमारी कलेज रोड, न्यूरोडलगायतका क्षेत्रमा अहिले धमाधम काम भैरहेको छ ।
