भरतपुर, २१ मंसिर
केही दिनअघि गाँजा नष्ट गर्न दर्जनौं प्रहरी लिएर जिल्लाको पहाडी गाउँहरुमा पुगेका प्रमुख जिल्ला अधिकारी(सीडीओ) जितेन्द्र बस्नेतले प्रहरी लगाएरै गाँजा हटाउँछु भन्नु सम्भव नभएको बताएका छन् ।
उनले गाँजा खेती स्थानीयबासीबाट सामान्य रुपमा नभएको बताए । बाहिरका मान्छे आएर जग्गा भाडामा लिएर खेती गरिएको भन्दै उनले भने, “त्यहाँका स्थानीयलाई काममा खटाइएको छ । खेती गर्ने बाहिरका छन् ।” उनले गाउँ पुग्दा कोही पनि मान्छे नभेटिएको बताए ।
प्रजिअ बस्नेतले गाँजा फाँडेर उपलब्धि नभएको भन्दै यसलाई नीति बनाएर व्यवस्थित गर्नुपर्ने बताए । तत्कालका लागि गाँजा फाँड्नु एक उपाय भएपनि यो उपयुक्त उपाय नभएको उनले बताए । “स्थानीयलाई अन्य खेतीतर्फ आकर्षित गर्न स्थानीय तह जिम्मेवार बन्नुपर्छ”, उनले भने ।
