भरतपुर, २ फागुन ।
चितवन जिल्ला फुटबल संघको आयोजनामा बिहीबारबाट राइट एण्ड एसोसियट अन्तर बिद्यालय यु–१४ फुटबल प्रतियोगिता सुरु हुँदैछ । भरतपुरको गेष्टहाउस चौरमा बिहीवारबाट सुरु हुने प्रतियोगिता आगामी फागुन ९ गतेसम्म सञ्चालन हुने प्रतियोगिताका मिडिया संयोजक कृष्ण कार्कीले जानकारी दिए ।
प्रतियोगिताका सबै खेलहरु नकआउटको आधारमा खेलाइनेछ । प्रतियोगितामा चितवनका बिभिन्न १४ विद्यालयका यु–१४ टोलीको सहभागिता रहने भरतपुर फुटबल क्लबका क्याप्टेन कार्यक्रम संयोजन गरिरहेका भरतपुर फुटबल क्लबका क्याप्टेन धुर्व भुषालले जानकारी दिए ।
चितवन जिल्ला फुटबल संघ मुख्य आयोजक रहेको प्रतियोगितामा यात्रा ग्रुप र भरतपुर फुटबल क्लब सहआयोजक छन् । प्रतियोगितामा पहिलो र दोस्रो हुनेले ट्रफी, मेडल र प्रमाणपत्र पाउनेछन् । यस्तै म्यान अफ दी सिरिज, उत्कृष्ट गोलरक्षक र सर्वाधिक गोलकर्तालाई पनि ट्रफी, मेडल र प्रमाणपत्र प्रदान गरिने आयोजकले जानकारी दिएको छ ।
चितवनको फुटबलमा राम्रो सम्भावना रहेकोले जुनियर लेभलदेखि नै सशक्त खेलाडी उत्पादन गर्दै लैजाने उद्देश्यका साथ प्रतियोगिता आयोजना गरिएको चितवन जिल्ला फुटबल संघका अध्यक्ष श्रीकृष्ण कार्कीले बताए ।
प्रतियोगितामा बिहीबार हुने उद्घाटन खेल बाल्मीकि स्कूल र ब्लुबर्ड स्कूलबीच हुनेछ भने दोस्रो खेलमा नारायणी पब्लिक स्कूल र डन एकेडेमी भिड्ने मिडिया संयोजक कार्कीले जानकारी दिए ।
