चितवन, १३ माघ ।
विभिन्न मुद्दामा काठमाडौंको डिल्लीबजार कारागार रहेका कैदी टीकाबहादुर थापालाई प्रहरीले चितवनमा गोली ठोकेर पक्राउ गरेको छ ।
बाइक चलाएका थापालाई प्रहरीले चितवनको रामनगरमा साँझ करिब ५ः१० बजे सडकमै गोली ठोकेको हो । ना. ४७ प ५०५२ नम्बरको मोटरसाइकल हाँकेका उनलाई प्रहरीले गोली हानेको हो । चितवन प्रहरी प्रमुख दीपक थापाका अनुसार थापालाई दुई गोली लागेको छ । हात र तिघ्रामा गोली लागेका उनको भरतपुर अस्पतालमा उपचार भइरहेको छ ।
पक्राउ गर्न गएको प्रहरी टोलीमाथि गोली चलाएपछि महानगरीय अपराध महाशाखाको टोलीले जवाफी फायरिङ गरेको एसएसपी दिवेश लोहनीले बताए ।
उनी ४ माघमा डिल्लीबजार कारागारबाट भागेका थिए । थापा काठमाडौंमा चोरी, लुटपाट र डकैतीसम्बन्धी घटनामा पटक–पटक पक्राउ पर्ने गरेका व्यक्ति हुन् ।
