भरतपुर, १५ पुस ।

२५ औं वार्षिकोत्सवको अवसरमा पञ्चरत्न ग्रुपले शुक्रबार रक्तदान कार्यक्रम गरेको छ । ग्रुपको केन्द्रीय कार्यालय नरायणगढमा आयोजित कार्यक्रममा ५३ जनाले रक्तदान गरेका छन् ।
कार्यालयका कर्मचारी र सर्वसाधारण रक्तदान कार्यक्रममा सहभागी थिए । ग्रुपका प्रबन्ध निर्देशक डा. तिलचन्द्र भट्टराईले रक्तदान गरेर कार्यक्रमको शुभारम्भ गरेका थिए । चितवनमा बढ्दो रगतको मागलाई ध्यानमा राखेर सामाजिक सेवाअन्तर्गत कार्यक्रम आयोजना गरिएको ग्रुपका प्रमुख कार्यकारी अधिकृत (सिईओ) सुवास रेग्मीले जनाकारी दिए ।
उनले रजत जयन्तीका अवसरमा निःशुल्क स्वास्थ्य परीक्षण, रक्तदान, प्राविधिक सेमीनार, पीटूसीटूअन्तर्गत आश्रित बालबालिकालाई न्यानो कपडा वितरण, अन्तरकर्मचारी भलिबल, फुटसल, हाजिरीजवाफ प्रतियोगिता, उद्योगबाट उत्पादित वस्तुको प्रयोगकर्ता र डिलरबीच छलफल कार्यक्रम सम्पन्न गरेको जानकारी दिए ।