मकवानपुर, २३ माघ ।
सत्तापक्ष र प्रतिपक्ष बिचको सहमतिपछि बागमती प्रदेश सभाको बैठक बुधबारबाट सञ्चालन हुने भएको छ । मंगलबार बसेको सर्वदलीय बैठकले संसद् सञ्चालन गर्ने सहमति जुटाएको हो । सत्तापक्ष र प्रतिपक्ष बीचको विवाद समाधानका लागि मंगलबारकाे लागि सभामुख भुवन कुमार पाठकले सर्वदलीय बैठक आह्वान गरेका थिए ।
१८ माघ मा सुरु हिउँदे अधिवेशनकाे पहिलो बैठकमा प्रदेशसभा स्थापना दिवस भएकाले मन्तव्यको कार्यसूचीपछि बैठक स्थगित गरिएकाे थियाे । कार्यसूचीमा परेका विधेयक तथा प्रतिवेदनहरु कार्यसुचीबाट हटाइएकाे थियाे । प्रमुख प्रतिपक्ष दलले बजेट लगायतका विषयकाे टुंगो नलागेसम्म बैठक सुचारु हुन नदने अडान लिए पछि १८ गतेकाे बैठक स्थगित भएकाे थियाे ।
प्रदेश सरकारले ल्याएका चार वटा विधेयक तथा विभिन्न समितिमा छलफल भई प्रतिवेदन तयार भएका केही विधेयकलाई छलफल तथा पारित गर्नुपर्ने भएकाले सर्वदलीय बैठक मंगलबार बसेकाे हाे । सर्वदलीय बैठकमा मौखिक सहमति पछि बागमती प्रदेश सभाको बैठक बुधबारबाट सञ्चालन हुने भएको छ । बैठकले विभिन्न विषयमा छलफल गर्दै सभा सञ्चालनको लागि प्रतिपक्ष र सत्तापक्षबिच माैखिक सहमति जुटाएको हो । बुधबार बस्ने प्रदेश सभाकाे बैठकमा प्रतिपक्षको अवरोध नरहने गरी सहमति भएको सभामुख पाठकले जानकारी दिए । बुधबारको बैठकमा निर्धारित कार्यसूची अनुसार विधेयकहरू प्रस्तुत हुनेछ ।
सरकारको तर्फबाट प्रतिपक्षले उठाएको मागका सन्दर्भमा अनुकूलताको आधारमा सम्बोधन गर्नेगरी बैठकमा छलफल भएको थियाे । प्रतिपक्ष दलले उठाइएकाे विगतको सहमति र विपद् प्रभावित क्षेत्रको पुनः निर्माण लगायतका विषयमा सरकारले क्रमशः सम्बोधन गर्नेगरी प्रतिबद्धता गरेको छ । प्रतिपक्ष दल माओवादी केन्द्रका संसदीय दलका नेता शालिकराम जम्कट्टेलले सर्वदलीय बैठकमा लिखित सहमति नभएकाे बताउँदै मौखिक प्रतिबद्धता भने सरकारबाट आएको बताए । उनले भने ‘सत्तापक्षबाट मौखिक प्रतिबद्धता आएको छ । हामी केही समय पर्ख र हेरको स्थितिमा छौं ।’
यसै बीच बागमती प्रदेश सभाको बैठक प्रदेशसभा भवन हेटौंडामा बस्दैछ ।
प्रदेश सभा सचिवालयका अनुसार सभाकाे आज २ वटा बैठकहरु संचालन हुनेछ । प्रदेशसभाको पहिलो बैठकमा संसदमा दर्ता भएका ४ विधेयकहरु पेश हुनेछ । यस्तै दोस्रो बैठकमा पेश भएका विधेयकहरु माथि छलफल हुने कार्यसुची रहेको प्रदेशसभा सचिवालयले जनाएकाे छ ।
