मकवानपुर, २० माघ ।
नेपाल कम्युनिष्ट पार्टी एमालेका सचिव योगेश भट्टराईले सामाजिक सञ्जालको प्रयोगलाई नियमन गर्नुपर्ने बताएका छन् । सामाजिक सञ्जाल नियमनकाे लागि सरकारले अध्यादेश ल्याएकाे उनले बताए ।
प्रेस चौतारी नेपाल मकवानपुरको नवौँ जिल्ला अधिवेशनको हेटौंडामा उद्घाटन् गर्दै उनले भने ‘जातीय द्वेष, सत्ताको कमजोरी, राष्ट्रिय एकता र व्यक्तिगत मर्यादामा नोक्सान पुर्याउने सामग्रीको प्रचारलाई रोक्नका लागि सामाजिक सञ्जालमा नियमन आवश्यक रहेको छ । बन्द गरिएको टिकटकलाई प्रधानमन्त्री ओलीको पालामा पुनः खोलिएको छ’ उनले भने ‘सामाजिक संजाललाई प्रतिबन्ध नगरी, प्रयोगलाई नियमनमा ल्याउनुपर्ने भएकाेले सामाजिक मिडिया प्लेटफर्महरूको नियन्त्रणको आवश्यकता रहेको छ ।’
‘समाजमा अनैतिक र भ्रामक कुरा फैलाएर सामाजिक असमझदारी सिर्जना गर्नुहुँदैन । यसका लागि प्रभावकारी नियमन जरुरी छ´ उनले भने । भट्टराईले फेसबुक, ट्विटर, टिकटक जस्ता सामाजिक मिडिया प्लेटफर्ममा अनैतिक र भ्रामक सामग्रीको प्रसारलाई रोक्नुपर्ने बताए । उनले भाने ‘यस्ता प्लेटफर्म मोनेटाइज गरि आम्दानी गर्नेलाई करको दायरामा ल्याउनु आवश्यकता रहेको छ ।’ ‘सरकारले ल्याएकाे अध्यादेशकाे टीका टिप्पणी र विराेध भइरहेकाे छ’ उनले भने प्रविधिकाे विकास संगेै सामाजिक सञ्जाल बलियाे भएकाे छ, सामाजिक सञ्जाल सभ्य र मर्यादित बनाउन नियमन जरुरी रहेकाेले अध्यादेश ल्याइएकाे हाे ।’
एमालेले अभिव्यक्ति स्वतन्त्रता, प्रेस स्वतन्त्रतालगायतका विषयमा दख्खल दिने काम नगर्ने बताउँदै उनले भने ‘नागरिकले सहज किसिमले सूचना पाउनु पर्छ भन्ने कुरामा पार्टी जाेड दिन्छ । अध्यादेश संविधानकाे विराेधमा छैन, ६ वटा अध्यादेश र २९ वटा कानुन संशाेधन गरेर आएका छन्’ उनले भने ‘समाजमा सुशासन कायम गर्न, जनतालाई चुस्त दुरुस्त सेवा प्रदान गर्न, लगानी मैत्री वातावरण तय गर्न बनाइएकाे छ ।’
अधिवेशनकाे अवसरमा अग्रज पत्रकारहरु प्रताप विष्ट, देवराज रिमाल, उज्जवल चाैलागाईं, रामकुमार एलन, ध्रुव चाैलागाईं सम्मान गरिएकाे छ । कार्यक्रममा प्रेस चौतारीले मकवानपुरले तीन जना पत्रकारलाई पुरस्कृत गरेको छ । पत्रकार धर्बेन्द्र दाहाल, प्रतिक्षा न्यौपाने र विवश अधिकारीलाई पुरस्कृत गरेको छ । उनीहरु तीनै जनालाई नगद सहित पुरस्कृत गरेको हो । प्रेस युनियनका जिल्ला अध्यक्ष सुवास विडारीलाई पत्रकार महासंघकाे निर्वाचनमा उल्लेख्य भूमिका निर्वाह गरेकाेले कदरपत्रद्वारा सम्मान गरिएकाे थियो ।
यसैगरी नेकपा एकीकृत समाजवादी निकट समाजवादी प्रेस संगठन मकवानपुरका अध्यक्ष शिव चौलागाई प्रेस चौतारीमा प्रवेश गरेका छन् । नवौँ जिल्ला अधिवेशनमा समाजवादी प्रेस संगठनका चौलागाईंसहित सिङ्गो जिल्ला कमिटी प्रेस चौतारी नेपालमा समाहित भएको हो ।
कार्यक्रममा नेकपा एमालेका केन्द्रीय सदस्य तथा मकवानपुर इन्चार्ज रामेश्सर राना, एमाले केन्द्रीय सदस्य भारती पाठक, पुर्व मन्त्री तथा प्रदेश सभा सदस्य एकालाल श्रेष्ठ, प्रेस चौतारी नेपालका वरिष्ठ उपाध्यक्ष गणेश पाण्डे, प्रेस चौतारीका नेता विश्वमणि सुवेदी, उपाध्यक्ष राजेश राई, महासचिव हिरामान लामा, सचिब विष्णु तारुके, नेकपा एमाले मकवानपुरका उपाध्यक्ष हिदम लामा लगायको आतिथ्यता रहेको थियो ।
