काठमाडौं, १ माघ ।
पुष्प व्यवसायको व्यवसायिक विकास र प्रवर्द्धन गर्ने उद्देश्यले फ्लोरिकल्चर एसोसिएसन नेपाल (फ्यान) ले २६ औँ फ्लोरा एक्स्पो – २०८१ को आयोजना गर्ने भएको छ । ‘स्वच्छ वातावरण तथा आर्थिक समृद्धिका लागि पुष्प व्यवसाय’ भन्ने मूल नाराका साथ चैत १ देखि ४ गतेसम्म काठमाडौंको भृकुटीमण्डप प्रदर्शनी हलमा उक्त एक्स्पो आयोजना हुने छ । विगत वर्षमा झैँ यस वर्ष पनि फ्लोरा एक्स्पोमा नर्सरी व्यवसायीहरूले उत्पादित गुणस्तरिय फूल तथा आलंकारिक बोटबिरुवाहरूको प्रतिस्पर्धा गराइने छ । यस्तै उत्कृष्ट स्टल, ल्याण्डस्केपिङ्ग, मौसमी फूल, आलंकारिक बिरुवा, फूल्ने बिरुवा, पुष्प सजावट तथा कट फ्लावर (गुलाब, जरबेरा, कार्नेशन, आदि) विधामा पुरस्कृत गरिनेछ । विजेताहरूलाई सिल्ड, नगद पुरस्कार र प्रमाण – पत्र प्रदान गरिने फ्लोरिकल्चर एसोसिएसन नेपाल (फ्यान) का वरिष्ठ उपाध्यक्ष तथा मेलाका संयोजक रामबहादुर तामाङले जानकारी दिए ।
त्यसैगरी उक्त एक्स्पो सहभागी हुने नर्सरी वा फर्मले ३ वटा विधामा मात्र प्रतिस्पर्धा गर्न पाउने छन् । साथै पुष्प उत्पादक, थोक तथा खुद्रा व्यापारी, आयात तथा निर्यातकर्ता, सामग्री आपूर्तिकर्ता कम्पनी फर्महरु तथा उपभोक्ताहरूको सक्रिय सहभागिता रहने छ । त्यस्तै स्टल बुकिङ्गको प्रक्रिया माघ २ गतेदेखि शुरु हुने छ । साधारण स्टलको क्षेत्रफल २४ वर्गमिटर र अफिसियल स्टल ९ वर्गमिटर क्षेत्रफलको हुने छ । स्टल शुल्क फ्यानका सदस्यका लागि २५ हजार रुपैयाँ र गैरसदस्यको लागि ४० हजार रुपैयाँ तोकिएको छ ।
२६ औँ फ्लोरा एक्स्पोले पुष्प व्यवसायलाई थप व्यावसायिक रूपमा सशक्त बनाउन र वातावरणीय सचेतना जगाउन महत्त्वपूर्ण भूमिका खेल्ने अपेक्षा गरिएको छ ।