मकवानपुर, २३ भदौ ।
मकवानपुरको हेटौंडाबाट प्रहरीले लागूऔषध चरेशसहित २ जनालाई पक्राउ गरेको छ । प्रहरीले शुक्रबार साँझ करिब ७ बजेतिर हेटौंडा–१५, रातोमाटेस्थित प्रहरी चेक पोष्टबाट धादिङ गजुरी गाउँपालिका–८ का ४२ वर्षीय केदार तामाङ र ३६ वर्षीय सुकमान तामाङलाई पक्राउ गरेको हो । उनीहरूबाट १४ किलो चरेश बरामद गरिएको जिल्ला प्रहरी कार्यालय मकवानपुरले जनाएको छ ।
हेटौंडाबाट पथलैयातर्फ जाँदै गरेको ना. ७ ख ६०६१ नम्बरको यात्रुवाहक बसलाई जाँच गर्ने क्रममा सो परिमाणमा चरेश फेला परेको हो । पक्राउ परेका दुवै जनालाई मकवानपुर जिल्ला अदालतबाट १० दिनको म्याद लिई हिरासतमै राखेर अनुसन्धान गरिरहेको जिल्ला प्रहरी कार्यालय मकवानपुरले जनाएको छ ।
