भरतपुर, २४ साउन ।
नुवाकोटको शिवपुरीमा भएको हेलिकप्टर दुर्घटनामा चार जना यात्रुसहित पाइलटको मृत्यु भएको छ । चार जना चिनियाँ र एक नेपालीको मृत्यु भएको जिल्ला प्रहरी कार्यालय नुवाकोटका एसपी शान्तिराज कोइरालाले जानकारी दिए ।
कोइरालाका अनुसार शिवपुरी गाउँपालिका–७ शिवपुरी जङ्गलको सूर्यचौर क्षेत्रमा एयर डाइनेस्टीको हेलिकप्टर दुर्घटनामा परेको हो । नागरिक उड्डयन प्राधिकरणले बुधबार एक विज्ञप्ति जारी गर्दै काठमाडौँ विमानस्थलबाट दिउँसो १ः५४ मा उडेको जहाज (९एन–एजेडी) स्याफ्रुबेशी (रसुवा जिल्ला) जाँदै थियो ।
उक्त हेलिकप्टर क्याप्टेन अरुण मल्लले उडाइरहेका थिए । नेपाल नागरिक उड्डयन प्राधिकरणक सहप्रवक्ता ज्ञानेन्द्र भूलका अनुसार हेलिकोप्टर उडेको तीन मिनेटमै सम्पर्कविहीन भएको थियो ।
