चितवन, १६ असार ।
सेन्ट्रल कलेज चितवन जिल्ला ए डिभिजन लिग फुटबलमा एष्ट्रल युथ सोसाइटी र सौराहा युवा समाजले अंक बाँडेका छन् ।
लिग अन्तर्गत आइतबार भरतपुर ७ कृष्णपुर मैदानमा सम्पन्न समूह ए को खेलमा १-१ गोलको बराबरी गर्दै दुबै टिमले अंक बाँडेका हुन् । खेलमा एष्ट्रलका लागि जुनित घिसिङ र सौराहाका लागि सञ्जय चौधरीले गोल गरे ।
खेलको आठौं मिनेटमा जुनितको गोलमा एष्ट्रलले अग्रता लिएको थियो । तर उसको अग्रता पहिलो हाफसम्म मात्रै सीमित रह्यो । ५८ औं मिनेटमा सौराहाका सञ्जयले बराबरी गोल फर्काए ।
खेलमा थप गोल हुन नसकेपछि दुई टिमले एक-एक अंक बाँडेका हुन् । सौराहाका सरोज दर्लामी म्यान अफ दि म्याच भए । उनले ट्रफीसहित दुई हजार पाँच सय प्राप्त गरे ।
लिगमा सोमबार समूह बी का रामपुर फुटबल क्लब रड्स र हर्दी युवा समाजबीच प्रतिस्पर्धा हुनेछ । खेल बेलुकी ५ बजे हुनेछ ।
चितवन जिल्ला फुटबल संघको आयोजनामा जारी प्रतियोगिताको मुख्य प्रायोजकमा सेन्ट्रल कलेज अफ भोकेसनल ट्रेनिङ प्रालि रहेको छ ।
