गैंडाकोट, ९ वैशाख ।
गैंडाकोट नगरपालिका वडा नम्बर ५ मा रहेका बाल क्लबलाई खेलकुद सामग्री उपलब्ध गराइएको छ । वडामा रहेका १९ वटा बाल क्लबलाई वडाले आइतबार खेलकुद सामग्री वितरण उपलब्ध गराएको हो ।

नगर प्रमुख मदनभक्त अधिकारीको प्रमुख आतिथ्यमा उक्त कार्यक्रम गरिएको थियो । खेलकुद सामग्री वितरण गर्दै नगर प्रमुख अधिकारीले बालबालिकालाई खेलकुद क्षेत्रमा अघि बढ्नका लागि खेलकुद सामग्री वितरणले महत्वपूर्ण भूमिका निर्वाह हुनेमा विश्वस्त रहेको बताए ।

वडाका सबै १९ वटा बाल क्लबलाई खेलकुद सामग्री विरण गरिएको वडा अध्यक्ष रत्नप्रसाद सापकोटाले जानकारी दिए । `बालबालिकालाई खेलकुदमा हौसला प्रदान गर्न सामग्री प्रदान गरिएको हो´, सापकोटाले भने – `बालबालिकाको विकासका लागि शिक्षासँगै खेलकुदको पनि उत्तिकै महत्त्व रहेकाले वडाले बालबालिकालाई प्रोत्साहनका लागि खेलकुद सामग्री वितरण गरेको हो ।´

कार्यक्रममा व्याडमिन्टन, भलिबल, फुटबल, क्यारेमबोर्डलगायत सामग्री बाल क्लबलाई वितरण गरिएको हो । खेलकुद सामग्री पाएपछि बाल क्लबका विद्यार्थीहरु खुशी हुँदै वडा कार्यलयलाई धन्यवाद दिए । कार्यक्रममा शान्ति न्यौपाने, लक्ष्मण कार्की, विष्णु गौतम, पार्वती सापकोटालगायतले कार्यक्रमका बारेमा बोलेका थिए ।