चैत २७, काठमाडौं ।
सिस्नुपानी नेपालले गायिका मेनुका पौडेललाई सम्मान गरेको छ। घोडेजात्राको अवसरमा सोमबार प्रज्ञा प्रतिष्ठानमा आयोजित ‘राष्ट्र’ कार्यक्रममा राष्ट्रपति रामचन्द्र पौडेलले गायिका पौडेललाई एक लाख रुपैयाँले सम्मान गरेका हुन् ।
कार्यक्रममा प्रधानमन्त्री पुष्पकमल दाहाल प्रचण्ड तथा देशका विशिष्ट व्यक्तिहरूको उपस्थिति रहेको थियो । करिब ३ घण्टा चलेको उक्त कार्यक्रममा विभिन्न प्रस्तुति समेत देखाइएका थिए ।
कार्यक्रमा टीकाराम यात्रीको स्वरमा वृत्तचित्र प्रस्तुत गरिएको थियो । शिशिर योगीले राष्ट्र शीर्षकको गीत गाएका थिए । उक्त गीतमा टंक आचार्यको शब्द रहेको थियो भने संगीत संयोजन अशोक राईले गरेका थिए ।
सीता सुवेदी र सरोज लामिछानेले विशेष नृत्य र चित्रकला देखाएका थिए । यस्तै लक्ष्मण गाम्नागे र अर्जुन पराजुलीले कवितावाचन गरे ।
अबको नेपालबारे प्रेन्सा रेग्मीले आफ्नो विचार प्रस्तुत गरेकी थिइन् भने मिथिला नाट्य परिषद्ले देशभक्त झल्किने मिथिला नृत्य देखाएको थियो।
कार्यक्रममा सम्मानित चर्चित गायिका पौडेलले राष्ट्र गायन गरेकी थिइन् भने नेपाली सेनाले जय जय जय गोर्खाली बोलको गीतमा राष्ट्रभक्ति नृत्य देखाएको थियो।
मनोज गजुरेल र चक्र दवाडीले शहिद गेट शीर्षकममा प्रस्तुति दिएका थिए। कार्यक्रमको अन्त्यमा भक्तराज आचार्य स्मृति गीत प्रस्तुत गरिएको थियो।
जसममा दीप श्रेष्ठ, दीपक खरेल, मीरा राणा, मुरलीधर, मदनकृष्ण श्रेष्ठ, हरिवंश आचार्य, संगीता राना प्रधान, लोचन भट्टराई, कुन्ति मोक्तान, देविका बन्दना, आनी छोइङ, धिरेन्द्र प्रेमर्षि, सत्यराज र स्वरूपराज आचार्यले सामूहिक प्रस्तुति दिएका थिए।
कार्यक्रमका परिकल्पनाकार तथा संयोजक टंक आचार्यले राष्ट्र हामी सबैको आस्था र आमा रहेको भन्दै भूगोल जनता सरकारभन्दा माथि राष्ट्र रहनुपर्ने सन्देश दिन कार्यक्रम निर्माण गरेको बताए।
“राष्ट्र भन्नु मुर्त कुराका साथै अमूर्त भाव र सम्मान पनि हो। आज यति सुन्दर राष्ट्र छोडेर जीविकोपार्जनका लागि विदेशीने कर्मशिल नेपाली र सधैंको लागि विदेश पलायन हुनेको संख्या निकै बढेको छ। कतिपय नागरिक यसै राष्ट्रमा बसेर पनि निराशाको बादलमा रुमल्लिएको पाइन्छ। राष्ट्र निर्माणमा अतुलनीय योगदान दिने कति व्यक्ति र विषय ओझेलमा परेका छन्,” संयोजक आचार्यले भने, “यसै सन्दर्भमा नेपाली समाजको एकता र समृद्धि राष्ट्र र राष्ट्रियताप्रतिको भक्तिभाव एवं हाम्रो आगामी कर्तव्य प्रस्तुत गर्नने उद्देश्यले ‘राष्ट्र’ शीर्षकमा कार्यक्रम गरिएको हो । मानवमूल्य र इतिहासप्रतिको सम्मान, वर्तमानको जिम्मेवारी र भविष्यको बाटो प्रस्तुत हुने गरी साहित्य कला र विचारको कार्यक्रम गरिएको हो ।”
