भरतपुर, २ चैत ।
नेपाली कांग्रेस भरतपुर महानगरपालिका–७ वडा समितिले वडाबासी जनताहरूको स्वास्थ्य सहितका १३ समस्या समाधान टिम बनाएको छ ।
वडा समितिले एक सूचना जारी गरी बिरामीका लागि रगतदेखि स्वास्थ्यसम्म विभिन्न समस्या परेमा त्यस्ता व्यक्तिलाई सहजीकरण आवश्यक परेमा सम्बन्धीत तोकिएका सम्पर्क व्यक्तिसँग समन्वय गर्न अनुरोध गरेको छ ।
नेपाली कांग्रेस भरतपुर–७ का वडा सभापति विनोद ढकालले विभिन्न समस्यामा सहजीकरण गर्नका लागि वडाबासीको हरेक सुखदुःखमा साथ दिने उद्धेश्यले फोकल पर्सनको सम्पर्क नम्बर समेत उपलब्ध गराइएको जनाए । सम्बन्धीत क्षेत्रको विज्ञताको आधारमा जिम्मा दिईएको वडा सचिव शिवराम अधिकारीले जानकारी दिए ।
वडा भित्रका जनतालाई स्वास्थ्य उपचार वा दैनिक खानामा समस्या भएमा वडा सभापति ढकालले सहयोग एवम् सहजीकरण गर्नेछन् । त्यस्तै, बिरामीका लागि रगत आवश्यक परेमा कृष्णप्रसाद ढकाल र जगनाथ न्यौपानेले सहजीकरण गर्नेछन् ।
वडा कार्यालयको सेवामा किरण अधिकारी, अमृता गौतम र रिता दर्जीले सहजीकरण गर्ने ढकालले जानकारी दिए । संघसंस्था, प्रशासन एवम् विद्युतसँग समन्वय गर्नुपरेमा दीपेन्द्रराज पौडेल, रविभद्र खनाल र कल्पना पौडेललाई सम्पर्क गर्न वडा सचिव अधिकारीले अनुरोध गरे ।
त्यस्तै बालबालिकाहरुलाई शैक्षिक सामग्री सहयोग आवश्यक परेमा विकास पौडेल, सहकारी तथा वित्तीय समन्वय गर्नुपरेमा राजेन्द्रबाबु ढकाल र रामचन्द्र चालिसे, युवा समन्वय गर्नुपरेमा शिवराम अधिकारी, राजकुमार गुरुङ र मेलमिलापकर्ताको लागि पार्वती कँडेल र मिलन थापाको सम्पर्क नम्बर उपलब्ध गराइएको छ ।
त्यसैगरी, कृषि क्षेत्रको लागि नेत्रप्रसाद पौडेल र घननाथ महतो, सुरक्षा तथा खेलकुदका लागि बाबुराम अधिकारी र अशोक विष्ट, महिला हिंसा विरुद्धको लागि मुना रेग्मी र जानुका श्रेष्ठ, भ्रष्ट्राचार विरुद्धको अभियानको पूर्णचन्द्र अधिकारी र ज्येष्ठ नागरिक सहयोग तथा समन्वयका लागि चन्द्रकला पौडेल, नारायणप्रसाद भट्टराई र अम्बिका पोख्रेललाई सम्पर्क गर्न वडा सचिव अधिकारीले अनुरोध गरेका छन् ।
कांग्रेस भरतपुर महानगरपालिका–७ वडा समितिले यसअघि स्थानीय तह, वडा कार्यालय, बिपि कोइराला मेमोरियल क्यान्सर हस्पिटल, स्वास्थ चौकी, प्रहरी चौकी, सार्वजनिक तथा निजी विद्यालय, बैंक , वित्तीय संस्थाहरु सम्बन्धित सेवाग्राहीको पक्षमा सर्वसुलभ र प्रभावकारी सेवा उपलब्ध गराउन अनुरोध सहित भेटघाट तथा साक्षात्कार कार्यक्रम गरेको वडा सचिव अधिकारीले जानकारी दिए । त्यस्तै, विपन्न वर्गलाई खाद्यान्न वितरण, वडावासी विद्यार्थी तथा जेष्ठ नागरिकलाई सम्मानलगायत जनसरोकारका विषयमा विभिन्न कार्यक्रमहरू गर्दै आएको छ ।
यसरी सामाजिक काममा निकै सक्रिय कांग्रेसको वडा समितिले समस्या समाधान गर्न भन्दै टिम बनाएर थालेको यो प्रयास प्रशंसनीय छ । यो समिति कागजमा मात्रै सीमित रहला वा प्रभावकारी रूपमा काम गर्ला त्यो भने समयले नै देखाउला ।
