भरतपुर, १४ पुस ।
भरतपुर निवासी सञ्जु पौडेलले जन्मदिनको अवसर पारेर श्री बालकुमारी कन्या मावि नारायणगढमा कक्षा ७ का विद्यार्थीलाई बालपत्रिका `मुना´ उपहार दिएकी छन् ।
पौडेलले शनिबार परेको आफ्नो जन्मदिनका अवसरमा एकदिन अगावै शुक्रबार विद्यालय पुगेर बालबालिकाका हातमा मुना पत्रिका उपलब्ध गराएकी हुन् । जन्मदिनमा केही राम्रो काम गरौं भन्ने उद्देश्यले सम्पूर्ण किताब नारायणगढको संयोजनमा बालकुमारी कन्या मावि पुगेर विद्यार्थीका हातमै मुना पत्रिका राखिदिएकी हुन् । पौडेल आफू सानो छँदा सोही विद्यालयमा पढेकी थिइन् । विद्यालयका प्रधानाध्यापक हेरम्बकुमार श्रेष्ठ असीमले अतिरिक्त पुस्तक एवम् पत्रपत्रिका पढ्ने बानीले विद्यार्थीमा सिकाइ सहजीकरण हुने बताए ।
मुना वितरण कार्यक्रममा विद्यालयका सह-प्रधानाध्यापक विष्णुप्रसाद वाग्ले, पठन संस्कारका अभियन्ता लेखराम सापकोटा, पत्रकार वसन्त पराजुली एवम् विद्यालयका शिक्षक-शिक्षिकाको उपस्थिति रहेको थियो ।
