एजेन्सी ।
भरतपुर, २७ जेठ ।
दक्षिण अफ्रिकाकी एक महिलाले एकै पटक १० वटा बच्चालाई जन्म दिएकी छिन् । ३७ वर्षीया गोसियामे थमारे सिथोलेले सोमबार १० वटा बच्चालाई जन्म दिएकी हुन् ।
अन्तर्राष्ट्रिय समाचार संस्था बीबीसीले उल्लेख गरेअनुसार उनले ७ वटा पुरुष र ३ वटी महिला बच्चालाई जन्म दिएकी हुन् । उनका आफन्तले बताएअनुसार ५ वटा बच्चाको जन्म प्राकृतिक रूपमा भएको थियो भने बाँकी ५ वटा बच्चालाई शल्यक्रिया गरी निकालिएको थियो । महिलाले एकै पटक १० वटा बच्चा जन्माएको यो विश्वकै पहिलो घटना भएको अनुमान गरिएको छ । सिथोलेको नाम विश्व कीर्तिमानमा राख्नुअघि उनले जन्म दिएका बच्चाका बारेमा थप अनुसन्धान गरिने गिनिज बुक अफ वर्ल्ड रेकर्डले बीबीसीलाई बताएको छ ।
यसअघि सन् २००९ मा ८ वटा बच्चालाई जन्म दिएकी अमेरिकाकी नादिया सुलेमानको नाममा सर्वाधिक बच्चालाई जन्म दिएको कीर्तिमान रहेको थियो । अघिल्लो महिना मालीकी २५ वर्षीया हलिमा सिस्सेले ९ वटा बच्चालाई जन्म दिएको बीबीसीले उल्लेख गरेको छ ।
