काठमाडौँ, ७ जेठ ।
विपक्षी गठबन्धनले माधवकुमार नेपाललाई प्रधानमन्त्रीका रुपमा अघि सार्ने विकल्प प्रस्ताव भएको बताइएको छ ।
कांग्रेस सभापति शेरबहादुर देउवा निवासमा भएको विपक्षी दलहरुको बैठकमा प्रधानमन्त्री केपी शर्मा ओलीलाई विस्थापित गर्न नेता नेपाललाई अघि सार्ने विषयमा कुराकानी भएको हो । संविधानको धारा ७६ (५) अुनसार सरकार गठनका लागि राष्ट्रपतिले दिएको समय शुक्रबार साँझ ५ बजेसम्म छ ।
उक्त बैठकमा राष्ट्रपति विद्यादेवि भण्डारीलाई महाअभियोग लगाउनेदेखि नेपाललाई प्रधानमन्त्रीको उम्मेद्वारका रुपमा अघि सार्नेसम्मका विकल्पमाथि चर्चा भएको थियो ।
उक्त बैठकपछि कांग्रेस, माओवादी केन्द्र, जसपाका उपेन्द्र यादव पक्ष र एमालेको नेपाल पक्ष आन्तरिक छलफल गरिरहेका छन् ।
बुढानिलकण्ठबाट फर्केर नेता नेपाल अहिले सिंहदरबारस्थित लेखा समितिको बैठक कक्षमा आफूनिकट नेताहरुसँग ब्रिफिङ गरिरहेका छन् । त्यहाँ सहभागी एक सांसदका अनुसार नेता नेपालले आफूलाई प्रधानमन्त्रीका रुपमा अघि सर्न प्रस्ताव आएको जानकारी गराएका छन् ।
तर उनी आफै भने त्यसका लागि तयार नभएको उनी निकट एक नेताले जानकारी दिए । उनले भने, ‘उहाँलाई प्रस्ताव गरिएको छ । तर उहाँ आफैँ त्यसका लागि तयार हुनुहुन्न ।’
विपक्षीले नेता नेपाललाई अघि सार्न तयारी गर्दै गर्दा केपी ओलीले फेरि आफूले धारा ७६ (५)को प्रधानमन्त्रीमा दाबी गर्ने घोषणा गरेका छन् ।
बुढानिलकण्ठमा भएको छलफलमा कांग्रेस, माओवादीका साथै एमालेको माधव नेपाल समूहबाट नेपाल र नेता भीम रावल सहभागी थिए भने जसपाबाट उपेन्द्र यादव र बाबुराम भट्टराई सहभागी भए । बैठकबाट बाहिरिने क्रममा माओवादी अध्यक्ष प्रचण्डले विभिन्न विकल्पमाथि छलफल भएको जानकारी दिएका छन् ।
