भरतपुर, २७ वैशाख ।

चितवनमा पछिल्लो २४ घण्टामा २ सय ७९ जना संक्रमित थपिएका छन् । २ सय ६६ जनामा पीसीआर तथा १३ जनामा एन्टिजेन विधिद्वारा गरिएको परीक्षणबाट संक्रमण पुष्टि भएको जिल्ला स्वास्थ्य कार्यालय चितवनले जनाएको हो । थपिएका संक्रमितसँगै चितवनमा सक्रिय संक्रमितको संख्या २ हजार ६ सय ८६ पुगेको छ । यो जिल्लाभित्रको सक्रिय संक्रमितको हालसम्मकै सर्वाधिक संख्या हो । हाल सक्रिय संक्रमितमध्ये १ सय ८३ जना अस्पतालको आइशोलेसनमा छन् भने बाँकी २ हजार ५ सय ३ जना घरमै आइशोलेसनमा रहेका छन् ।

कार्यालयले सोमबार प्रकाशन गरेको अद्यावधिक तथ्याङ्क अनुसार पछिल्लो २४ घण्टामा १ हजार १० जनाको स्वाब संकलन गरिएको थियो । पछिल्लो २४ घण्टामा भरतपुरमा २ सय १८ जना संक्रमित थपिएका छन् । चितवन जिल्लामा कूल संक्रमितको संख्या भने ९ हजार ९ सय २५ पुगेको छ । पछिल्लो २४ घण्टामा जिल्लाका ३० जना संक्रमणमुक्त भई घर फर्किएको स्वास्थ्य कार्यालयले जनाएको छ । कार्यालयका अनुसार जिल्लाका ७ हजार ९८ जना संक्रमित निको भइसकेका छन् ।

यस्तै, पछिल्लो २४ घण्टामा चितवनकाका ३ जना कोरोना संक्रमितको निधन भएको छ । जिल्लाभित्र संक्रमणका कारण मृत्यु वरण गर्नेको संख्या १ सय ४१ पुगेको छ । सबैभन्दा बढी भरतपुर महानगरपालिकाका ८७ जनाले संक्रमणका कारण ज्यान गुमाइसकेका छन् । यस्तै, रत्ननगर नगरपालिकाका १८ जना संक्रमितको मृत्यु हुँदा खैरहनीका ९ तथा राप्तीका १२ जनाको मृत्यु भएको छ । यस्तै, कालिका नगरपालिकाका १०, माडी नगरपालिकाका ४ तथा इच्छाकामना गाउँपालिकाका एक जनाको पनि संक्रमणकै कारण मृत्यु भएको छ ।