भरतपुर, २६ भदौ ।
पछिल्लो २४ घण्टामा नेपालमा नयाँ १ हजार ४५४ जनामा कोरोना संक्रमण पुष्टि भएको छ । स्वास्थ्य तथा जनसंख्या मन्त्रालयले शुक्रबार आयोजना गरेको नियमित कोभिड–१९ प्रेस ब्रिफिङमा प्रवक्ता प्रा. डा. जागेश्वर गौतमले अध्यावधिक विवरण प्रस्तुत गरेका हुन् । मन्त्रालयका अनुसार नेपालमा हाल कोरोना संक्रमितको कूल संख्या ५१ हजार ९१९ पुगेको छ । मन्त्रालयको पछिल्लो तथ्याङ्क अनुसार पछिल्लो २४ घण्टामा सबै भन्दा बढी काठमाडौं जिल्लामा ६२० जना संक्रमित थपिएका छन् । चितवनमा थपिएका संक्रमितको संख्या भने ७४ रहेको छ । देशमा हालसम्म पुष्टि भएका कूल संक्रमितमध्ये सक्रिय संक्रमितको संख्या भने १४ हजार ९२५ रहेको छ ।
पछिल्लो २४ घण्टामा संक्रमणबाट मुक्त भई ९७२ जना घर फर्किएका छन् । हालसम्म निको हुनेको संख्या भने ३६ हजार ६७२ पुगेको छ । यो कूल संक्रमितको करिब ७१ प्रतिशत हो । वाग्मती प्रदेशमा मात्रै हालसम्म ६ हजार ५३५ जना संक्रमणमुक्त भइसकेका छन् । मन्त्रालयका अनुसार हाल विभिन्न ८ जिल्लामा सक्रिय संक्रमितको संख्या शून्य रहेको छ । काठमाडौं, चितवन, लगायत ५ वटा जिल्लामा भने अझै पनि सक्रिय संक्रमितको संख्या ५ सय भन्दा बढी रहेको छ ।
यस्तै, पछिल्लो २४ घण्टामा देशभर ५ जनाले कोरोना संक्रमणका कारण ज्यान गुमाएका छन् । थपिएको संख्यासँगै नेपालमा कूल मृतकको संख्या ३२२ पुगेको छ ।
मन्त्रालयका अनुसार हाल देशभर ६ हजार ७८ जना क्वारेन्टाइनमा छन् भने १४ हजार ९२५ जना आइसोलेसनमा छन् । वाग्मती प्रदेशमा मात्रै ४ हजार ८१० जना संस्थागत आइसोलेसनमा छन् भने २ हजार ५०१ जना होम आइसोलेसनमा छन् । मन्त्रालयले हालसम्म पीसीआर विधिबाट ८ लाख २१ हजार १८६ वटा परीक्षण गरिएको जनाएको छ । पछिल्लो एक दिनमा देशभर १० हजार ७०१ परीक्षण भएका हुन् ।
मन्त्रालयका प्रवक्ता प्रा.डा. गौतमका अनुसार हाल देशभर २५ जनाको भेण्टिलेटरमा राखेर उपचार भइरहेको छ भने १७० जनाले सघन उपचार कक्षमा उपचार गराइरहेका छन् । वाग्मती प्रदेशमा २२ जनाको भेण्टिलेटरमा तथा १०७ जनाको आइसीयूमा उपचार भइरहेको मन्त्रालयले जनाएको छ ।
