धु्रवराज खनाल/कायाकैरन
रत्ननगर,२३ असार ।
महिलाहरुलाई आत्मनिर्भर बनाउन रत्ननगर १ वकुलहर स्थित उज्ज्वल महिला विकास वचत तथा ऋण सहकारी संस्थाले ठुलो रकम ऋण लगानी गरेको छ । २०५८ सालमा स्थापना भएको सो सस्थाले अहिले सम्म २ करोड २५ लाख रुपैया ऋण लगानी गरेको जनाएको छ ।
रत्ननगर नगरपालिकाका निर्वाचित जनप्रतिनिधीहरुसंगको अन्र्तक्रिया तथा सम्मान कार्यक्रममा संस्थाकी अध्यक्ष ऋतु गिरीले महिलाहरुलाई आत्मनिर्भर वनाउनका लागि सो रकम ऋणका रुपमा लगानी गरेको बताइन् । “महिलाहरुलाई सीप प्रदान गरेर आत्मनिर्भर बनाउँदै व्यवसायिक बनाउने संस्थाको लक्ष्य हो”, अध्यक्ष गिरीले भनिन, “यसबाट प्रतिफल आईरहेको छ,महिलाहरु सक्षम भइरहेका छन् ।” उनका अनुसार संस्थाले व्यापार, कृषि, पशुपालन, वैदेशिक रोजगारी, शिक्षा लगायतका क्षेत्रमा ऋण लगानी गरेको छ ।
कार्यक्रममा संस्थाकी व्यवस्थापक हेमा अधिकारीले १६ वर्षको अवधिमा २ करोड ७७ लाख करोडको कारोवार गरेको जानकारी दिइन् । संस्थाको रु ५८ लाख शेयर पुँजी, रु १५ लाख जगेडा कोष, रु १ करोड ३५ लाख वचत भएको व्यवस्थापक अधिकारीले बताइन् । संस्थामा हाल मासिक रु २०० देखी ५०० सम्म बचत गर्ने गरिएको छ ।
देउसी भैलो खेल्दै जग्गा किनेर आफ्नै भवन निर्माण गरेको सो सस्था १०८ जना महिला सदस्यबाट सुरुवात भएको थियो । हाल सो संस्थाको ७ सय ५० जना शेयर सदस्य छन् । सो अवसरमा संस्थापक अध्यक्ष लक्ष्मी गौलीले संस्थाले गरेका गतिविधीका बारे नगर प्रमुख,उपप्रमुख,वडा सदस्यहरुलाई जानकारी गराएकी थिइन् ।
कार्यक्रममा रत्ननगर नगरपालिकाका नगर प्रमुख नारायण वनले समुन्नत नगर विकासका लागि सहकारीको भूमिका महत्वपूर्ण रहेको बताए । “सहकारीले विपन्नलाई आत्मनिर्भर समेत बनाउँछ”, नगर प्रमुख वनले भने ,“सहकारीकै माध्यमबाट नगरले लिएको समृद्ध नगरको परिकल्पनालाई टेवा पुग्दछ ।” शेयर सदस्यहरुलाई तालिम मात्रै दिएर नहुने भन्दै नगर प्रमुख वनले साना साना उद्योग स्थापना गर्न सके आर्थिक विकास हुने धारणा राखे । “नगरमा सहकारी धेरै छन् तर व्यवसायिक बनाउन सकिएको छैन्”, नगर प्रमुख वनले भने , “उद्यमशीलता वनाएर साना साना उद्योग स्थापना गरि आर्थिक विकास गर्न जरुरी छ ।”
सहकारीले अर्वौको रुपैया कारोवार गर्ने भएकाले सहकारी सहकारी मिलेर वैक स्थापना गर्नु पर्ने उनले सुझाव दिए । कार्यक्रममा नगर उपप्रमुख विमला दुवाडीले महिलाहरुले गरेका काम छिट्टै सफल हुने भएकाले नगरपालिकाले यहाँका महिलाहरुका लागि आवश्यक सहयोग गर्न तयार गरेको बताइन् । सो अवसरमा संस्थाका पदाधिकारी तथा सदस्यहरुले नगरपालिका नजिकै संस्था रहेपनि वत्ती मुनिको अध्यारो जस्तो भएको गुनासो गरे ।
संस्थाकी सल्लाहकार चन्द्रकुमारी चौधरीले संस्थाले नेतृत्व तथा व्यक्तित्व विकास,आयआर्जन कार्यक्रम,स्वास्थ्य शिविर लगायतका कार्यक्रम गर्दै आईरहेको उल्लेख गर्दै नगरपालिकाले यस सहकारीलाई आफ्नो कार्ययोजनामा पार्न आग्रह गरिन् । संस्थाकी अध्यक्ष ऋतु गिरीको अध्यक्षतामा भएको कार्यक्रममा वडा सेवा केन्द्र वकुलहरका प्रमुख शंकर गिरी, इलाका प्रहरी कार्यालय टाँडीका प्रमुख प्रहरी नायव उपरिक्षक नारायण रञ्जितकार,वडा सदस्यहरु भरथी चौधरी, शालिग्राम पराजुली, बाबुराम गौतम, समाजसेवी विकना चौधरी, संस्थाकी सल्लाहाकार सरला रेग्मी,सचिव देवकला भट्टराई लगायतले मन्तव्य राखेका थिए । सो अवसरमा निर्वाचित जनप्रतिनिधीहरुलाई दोसल्ला ओढार सम्मान गरिएको थियो ।
