गैंडाकोट, १ साउन
कोरोना संक्रमितको संख्या बढ्न थालेपछि गैंडाकोट नगरपालिकाले नगर क्षेत्र सिल गर्ने निर्णय गरेको छ । नगरपालिकाले बिहीबार एक सूचना जारीगरी साउन २ गतेदेखि ८ गतेसम्म नगर क्षेत्र बन्द गरिएको जनाएको छ ।
गैंडाकोट नगर क्षेत्रका पाँच जना सुरक्षाकर्मीसहित होम क्वारेन्टाईनमा रहेका १८ जनाको बिहीबार बिहान प्राप्त रिपोर्टमा कोरोना पोजेटिभ देखिएपछि नगरपालिकाले समुदायमा कोरोना फैलिन सक्ने आशंकामा बन्द गरेको हो ।
नगर प्रमुख छत्रराज पौडेलले समुदायमा कोरोना फैलिनबाट जागाउन पूर्व तयारी स्वरुप एक हप्ताका लागि नगर क्षेत्र बन्द गरिएको बताए । उनले अब स्वाब परीक्षणको दायरा पनि बढाईने जानकारी दिए ।
नगरपालिकाका प्रमुख प्रशासकीय अधिकृत रामप्रसाद आचार्यले बिहीबार जारी गरेको सूचनामा दूध र दूधजन्य व्यवसाय, अत्यावश्यक सेवा तथा खाद्यान्न पसल, औषधि पसल बाहेकका अन्य सबै प्रकारका पसल तथा व्यवसायहरु पूर्ण रुपमा बन्द रहने उल्लेख छ ।
यसैगरी, नगरपालिका क्षेत्रभित्रका बैंकहरुले स्वास्थ्य सुरक्षा अपनाई सामाजिक दूरी कायम गर्दै अति न्यून कर्मचारीको परिचालन गरी दैनिक कार्य सञ्चालन गर्ने र बैंक बाहेकका अन्य वित्तीय संस्था एवं सहकारी संस्थाहरु पूर्ण रुपमा बन्द रहने सूचनामा उल्लेख छ । एम्बुलेन्स, दमकल, अत्यावश्यक कामका लागि स्वीकृत प्राप्त सवारी साधन बाहेक नगर क्षेत्रभित्र अन्य निजी तथा सार्वजनिक सवारी साधनहरु संचालनमा पूर्ण रुपमा निषेध गरिएको छ । गैंडाकोट नगरपालिक क्षेत्र हुँदै सञ्चालन हुने लामो दूरीका सवारी साधनहरुले यस क्षेत्रमा रोक्न, यात्रु चढाउन वा ओराल्न निषेध गरिएको छ ।
अत्यावश्यक काम बाहेक कोही पनि घरबाट बाहिर नजान र जानै पर्ने भए मास्क लगाई सामाजिक दूरी कायम गर्दै सुरक्षित रुपमा काम गर्न नगरबासीलाई आग्रह गरिएको नगर प्रमुख पौडेलले बताए । कोरोना भाइरसको संक्रमणबाट आफू पनि बच्न र अरुलाई पनि बचाउन सबैले आआफ्नो स्थानबाट सहयोग गर्नुपर्ने उनले बताए ।
