भरतपुर,१ असार ।
वीरेन्द्र बहुमुखी क्याम्पस भरतपुर गेट नजिकैको सडक छउमै रहेका दुई वटा सालको रुख ढालिएका छन् । रुख बूढो भएसँगै दुर्घटनाको जोखिम बढेको भन्दै बुधबार ढालिएका हुन् । नेपाल टिम्बर कर्पोरेसन चितवनले ढलाइएको साल व्यवस्थापन गरेको छ ।
जिल्ला वन कार्यालय चितवनले सडक छेउमा रहेको सालको रुख काट्न माघ महिनामा सडक डिभिजनलाई अनुरोध गरेपनि डिभिजन कार्यालयले बेवास्ता गर्दै आएको थियो । ट्राफिक कार्यालय तथा नागरिकस्तरबाट रुख हटाउन पटक–पटक अनुरोध गरेपछि अन्ततः रुख हटाइएको हो । स्काभेटरले खनेर रुख ढलाइएको हो । रुख ढलाउने क्रममा चौबिसकोठीदेखि लायन्सचोकसम्म करिब २० मिनेट यातायात सञ्चालनमा रोक लगाइएको थियो । ठूलो रुखले झण्डै आधा लेन ओगटेको थियो ।
वीरेन्द्र क्याम्पसको कम्पाउण्ड वालसँगै रहेको अर्को सालको रुख पनि हटाइएको छ । “वीरेन्द्र क्याम्पस चोकमा रहेका दुई सालका रुख दुर्घटनाको उच्च जोखिममा थिए”, जिल्ला ट्राफिक प्रहरी कार्यालय चितवनका प्रमुख सन्तोष पन्तले भने, “रुख हटाएपछि सडक क्षेत्राधिकार खुल्ला बनेको छ, यात्रा सहज बन्ने भएको छ ।” जिल्ला वन कार्यालय चितवनका प्रमुख केदारनाथ पोडेलले काटिएका साललाई लिलाम बढाबढ गरेर बिक्रि गरिने बताए ।
“सडक डिभिजनको खर्चमा कटान तथा ढुवानीको काम हुने छ”, उनले भने, “सडक क्षेत्राधिकार भएकाले डिभिजन कार्यालयको जिम्मेवारी हो, काटिएको साल बिक्रि वन कार्यालय मार्फत हुनेछ ।” असार देखि असोजसम्म सालका रुख काट्न नपाइने वन ऐनमा उल्लेख भएकाले बुधबार दुई रुख हटाइएको बताए । क्याम्पसको पर्खालसँगै रहेको सालको रुख हटाउने निर्णय मंगलबारमात्रै भएको थियो ।
