शिव गौतम
भरतपुर, २४ माघ
नेपाल सरकार शहरी विकास मन्त्रालयबाट सञ्चालित सघन शहरी विकास कार्यक्रम अन्तर्गत भरतपुर महानगरपालिकाको प्याकेज नं २ को महानगरीय रिंगरोड र लिंकरोड तथा ढल निर्माण कार्यको काम करिब ३० प्रतिशत मात्रै सकिएको छ ।
सो कार्यको शिलान्यास २०७५ असार २९ गते गरिएको भएपनि काम करिब ६ महिना ढिलो गरी सुरु भएको थियो । यो कार्यको ठेक्का हेटौंडाको रमन एण्ड शिवशक्ति जेभीले लिएको हो । आयोजनाको परामर्शदाता रहेको शहरी विकास तथा भवन निर्माण विभाग डिभिजन कार्यालय चितवनले भने तोकिएको समय २०७७ असार मसान्त अगाडी नै सम्पूर्ण काम सकिने जनाएको छ । प्याकेज नं २ मा महानगरीय रिंगरोडको पुल्चोक रामघाट सडक खण्ड पनि रहेको छ । “पुलचोक देखि रामघाट खण्डमा यतिबेला ग्याविन वाल लगाउने काम भइरहेको छ”, डिभिजन कार्यालयका इञ्जिनियर माधव कटुवालले भने । “बाटोमा केही रुखहरू परेका छन्, हटाउन वन कार्यालयसँग स्वीकृति मागेका छौं”, उनले सुनाए । रुख काट्न अनुमति मिलेपछि काम सक्न धेरै समय नलाग्ने उनले बताए ।
प्याकेज नं २ मा महानगरीय रिंगरोडसँगै अन्य ५ वटा सडक खण्डको स्तरोन्नति पनि समेटिएको छ । खर्चका दृष्टिले काम थोरै सम्पन्न भएको देखिए पनि यस बीचमा ढल मर्मतको कामले भने तीव्रता पाएको छ । “खर्चको दृष्टिकोणबाट हेर्दा केवल ३० प्रतिशत काम पूरा भएको छ, मान्छेले गर्ने काममा समय बितेकाले प्रगति नदेखिएको हो”, कटुवालले थपे, “मेसिनको सहयोगले काम गर्न थालेपछि आयोजना तोकिएकै समयमा सक्नेछौं ।” उनका अनुसार डिभिजन कार्यालय चितवनले प्याकेज नं २ मा परेका अधिकांश सडक खण्ड फागुन महिनाभित्र नै कालोपत्रे गरिसक्ने लक्ष्य राखेको छ । “प्रचण्ड मार्ग, दियालो रोड, पुलर–डेरी चोक–अतिथि पार्टी प्यालेस सडक खण्ड, लगायत सडक खण्ड फागुन महिनामै कालोपत्रे गर्ने सोच छ”, उनले बताए ।
आयोजनामै समेटिएको शहिद चोक धर्म चोक कचपचे चोकको काम पनि म्याद अगाडी नै सकिने परामर्शदाता कार्यालयले जनाएको छ । शहिद चोक देखि बेल चोक सम्मको सडक खण्डमा अस्तव्यस्त रूपमा निर्माण सामग्री र खनिएको माटो थुपारिँदा यातायातका साधन, पैदलयात्री र स्थानीयलाई अफ्ठेरो परेको गुनासो समेत सुन्नमा आएको छ । डिभिजन कार्यालयले भने लंकू खोलाको कल्भर्ट साँघुरो भएकाले त्यसलाई हटाएर नयाँ राख्न लागेकाले केही ढिलो भएको बताएको छ । “शहिद चोक देखि धर्मचोकको बीचमा पर्ने लंकू पुल साँघुरो रहेछ । त्यो पुललाई हटाएर फराकिलो कल्भर्ट राख्ने कुरा हुँदैछ”, उनले बताए । कल्भर्टको काम थप गर्नु परेको उनले जानकारी दिए । “त्यही कल्भर्टका कारण काम केही अड्केको हो । शहिद चोक देखि लंकू पुल र त्यहाँबाट धर्मचोक हुँदै कचपचे चोकको सडक विस्तारको काम असार मसान्त अघि नै सक्नेछौं”, उनले भने ।
शहिद चोक बेलचोक सडक खण्डको स्तरोन्नति ढिलो गरी सुरु हुँदा स्थानीय भने केही निराश देखिएका छन् । “चीनले वुहान शहरमा कोरोना भाइरस संक्रमित बिरामी राख्नका लागि १००० शैया क्षमताको अस्पताल दुई हप्ताभन्दा पनि कम समयमा निर्माण ग¥यो”, एक सर्वसाधारणले भने, “नेपालमा भने विकास निर्माणका काम सुस्त गर्नुपर्छ भन्ने चलन छ ।” नेपाली निर्माण कम्पनी, ठेकेदार र परामर्शदाता कार्यालयहरूले चीनबाट पनि केही कुरा सिक्न आवश्यक देखिएको केहीले सुझाव दिए ।
