रत्ननगर,२४ जेठ । रत्ननगर महोत्सवको स्थान परिवर्तन गर्न संरक्षणकर्मीले रत्ननगर नगरपालिकाको ध्यानाकर्षण गराएका छन् । रत्ननगर उद्योग वाणिज्य संघ र रत्ननगर नगरपालिकाको आयोजनामा प्रत्येक दुई–दुई वर्षमा रत्ननगरको टिकौली चौरमा महोत्सव हुँदै आएको छ ।
महोत्सवस्थल बरण्डाभार क्षेत्र नजिकै पर्ने भएकाले जंगली जनावरलाई असर गर्ने भन्दै एनिमल राईट्स क्लब र संरक्षणकर्मी धु्रव अधिकारीले मंगलबार नगरपालिकाका उपमेयर विमलादेवी दवाडीलाई ध्यानाकर्षण गराउँदै ज्ञापनपत्र बुझाएका हुन् । संरक्षणकर्मी अधिकारीले उपमेयर दवाडीलाई सो ज्ञापनपत्र हस्तान्तरण गरे ।
वरण्डाभार जैविक मार्ग हुँदै जंगली जनावर आवतजावत हुँदै आएका छन् । “महोत्सवस्थल पर्यावरणीय हिसाबले उचित छैन”, संरक्षणकर्मी अधिकारीले भने, “महोत्सवजस्ता क्रियाकलापले उत्पन्न हुने ध्वनी प्रदूषण, जल प्रदूषणले वन र जनावरलाई असर गर्छ, त्यसैले स्थान परिवर्तन गर्न आवश्यक छ ।” उपमेयरलाई हस्तान्तरण गरिएको ज्ञापनपत्रमा महोत्सवको वैकल्पिक स्थान खोजी गर्न आग्रह गरिएको छ । ज्ञापनपत्र बुझ्दै नगर उपप्रमुख विमला दुवाडीले यो संवेदनशील कुरा भएकाले आफूले बोर्ड बैठकमा राखेर समाधान खोज्ने बताइन् । रत्ननगर महोत्सव आउन अब ७ महिना बाँकी छ ।