२० जेठ । ऊर्जामन्त्री जनार्दन शर्माले नेकपा(माओवादी केन्द्र)का अध्यक्ष पुष्पकमल दाहाल ‘प्रचण्ड’ नेतृत्वको सरकार इतिहासकै सफल सरकार भएको बताएका छन् ।
प्रेस सेन्टर नेपाल ललितपुर शाखाले आज आयोजना गरेको प्रशिक्षण कार्यक्रमलाई सम्बोधन गर्दै उनले सरकारले गरेका कामको जनतासम्म सही सूचना पुग्न नसक्दा स्थानीय तहको पहिलो चरणको निर्वाचनमा माओवादीको सोचेअनुसारको नतिजा आउन नसकेको दाबी गरे ।
उनले भने प्रधानमन्त्रीले गरेको काम राम्ररी प्रचार हुन नसकेकाले चुनावमा चामल नबिकेर पिठो मात्रै विकेको भनेर भनिसकेका छन् । दिनमा पार्टी र सरकारले गरेका सही कामको सूचना प्रवाहमा बढी मेहनत गर्नुपर्ने देखिएको छ ।”जनताका पक्षमा सही काम गरेर देखाए पनि सूचना प्रवाह प्रभावकारी तवरले हुन नसक्दा पार्टीका पक्षमा जनलहर आउन नसकेको उनको कथन छ ।
पार्टीले जनताका पक्षमा जायज र सार्थक काम गरेको उल्लेख गर्दै उनले विद्युत्भार कटौतीको अन्त्य, उज्यालो नेपाल अभियान, राष्ट्रिय गौरवका आयोजनाको कार्यप्रगति, २५ वर्षपछिको उच्च आर्थिक वृद्धि सफलताका उदाहरण रहेको बताए ।
ऊर्जामन्त्री शर्माले आगामी दिनमा प्रचारप्रसारको कामलाई पनि व्यवस्थित तवरले अगाडि बढाउनुपर्नेमा जोड दिनुहुँदै प्रेस स्वतन्त्रतालाई स्थापित गर्न सबै सरोकार भएका निकाय क्रियाशील हुनुपर्नेमा जोड दिए।
प्रेस सेन्टर ललितपुरले जिल्लामा क्रियाशील करिब ५० पत्रकारलाई विकास पत्रकारिताबारे प्रशिक्षण दिएको हो । सांसद योगेन्द्र घिसिङको निर्वाचन क्षेत्र विकास कार्यक्रमअन्तर्गत पत्रकारलाई तालिम प्रदान गरिएको नेपाल पत्रकार महासङ्घ, ललितपुरका अध्यक्ष ज्ञानप्रसाद पौडेलले जानकारी दिए ।
कार्यक्रममा माओवादी केन्द्र ललितपुरको इन्चार्ज हरि दाहालले छोटो समयको तयारीका साथ निर्वाचनमा होमिदा जिल्लामा पार्टीको उपस्थिति कमजोर देखिएको बताए।
कार्यक्रममा प्रेस सेन्टरका अध्यक्ष महेश्वर दाहाल, उपाध्यक्ष ओम शर्मालगायत प्रशिक्षण दिएका थियो । रासस
