१५ जेठ । चितवन कांग्रेसले भरतपुर महानगरपालिका वडा नम्बर १९ मा पुनः मतदान गर्न माग गरेको छ । सोमबार कांग्रेस चितवनका सभापति जितनारायण श्रेष्ठले विज्ञप्ति जारी गर्दै पुनः मतदान हुनुपर्ने माग गरेका हुन् ।
उनले कांग्रेस–माओवादी गठबन्धन उम्मेदवार रेणु दाहालको विजय सुनिश्चित हुने दिशामा गइरहेका बेला मतपत्र च्यातिएको दाबी गर्दै पुनः मतदान गर्न माग गरेका हुन् । च्यातिएका मतपत्रका कारण भरतपुर महानगरको नतिजालाई असर गर्ने भएकाले स्थानीय निर्वाचन ऐनअनुसार पुनः मतदान हुनुपर्ने कांग्रेसको माग छ । चितवन कांग्रेसले मतपत्र च्यात्ने घटनाको निन्दा गर्दै दोषीलाई अविलम्ब कारबाही गर्न मागसमेत गरेको छ ।
यसअघि माओवादी केन्द्रका नेता नारायण दाहालले पनि वडा नम्बर १९ मा पुनः मतदान हुनुपर्ने माग गरेका छन् । तर, एमाले जिल्ला अध्यक्ष कृष्णभक्त पोखरेलले भने पुनः मतदान गर्नु आवश्यक नरहेको जनाउँदै मतगणना सुचारु हुुुनुपर्ने पत्रकार सम्मेलन गरी बताइसकेका छन् ।
भरतपुर महानगरपालिकाको मतगणना अन्योलमा परेको छ । यस विषयमा निर्णय गर्न निर्वाचन आयोगको बैठक बसे पनि कुनै टुंगो लागिसकेको छैन ।
