धु्रवराज खनाल/कायाकैरन
रत्ननगर,१० असोज ।रत्ननगर नगरपालिकाका पाँच ठाउँलाई ‘फ्री वाईफाई जोन’ बनाइएको छ । नगरलाई सूचना प्रविधिमैत्री बनाउनुका साथै सर्वसाधारणलाई निःशुल्क इन्टरनेटको सुविधा दिने उद्देश्यले ती ठाउँमा वाईफाई निःशुल्क चलाउने व्यवस्था गरिएको हो ।
पहिलो चरणमा रत्ननगर–११ स्थित धर्मधाम, रत्ननगर–१ स्थित बसपार्क, २ को टाँडीचोक, ७ को चराचोक र १४ स्थित पारिजात चोकलाई फ्री वाईफाई जोन बनाइएको नगर प्रमुख नारायण वनले बताए । वनका अनुसार अन्य क्षेत्रमा पनि यसलाई विस्तार गरिनेछ । इन्टरनेट सेवा प्रदायक कम्पनी टेकमाइन्ड नेटवर्कसँगको सहकार्यमा नगरपालिकाले निःशुल्क वाईफाईको सेवा सुरु गरेको हो ।
नप्रतिनिधिहरुले स्थानीय तहको चुनावमा नगरलाई फ्री वाईफाई जोन बनाउने चुनावी नारासमेत बनाएका थिए । “सामान्य नगरबासीलाई पनि इन्टरनेटको पहुँचमा पु¥याउने हाम्रो लक्ष्य हो”, नगर प्रमुख वनले भने, “इन्टरनेटको प्रयोगबाट हरेक वर्ग लाभान्वित हुने आशा छ ।” श्रीकृष्ण प्रणामी मन्दिर धर्मधाम जिरौनामा एक कार्यक्रमबीच मंगलबार प्रतिनिधि सभा सदस्य एवं पूर्व अर्थमन्त्री सुरेन्द्र पाण्डेले सेवा शुभारम्भ गरे ।
नगरपालिकाले सुरुवात गरेको यो कार्यले नगरबासीको जीवन सहज र परिणाममुखी बनाउने विश्वास उनले व्यक्त गरे । विशेषत यसले विद्यार्थी र बालबालिका बढी लाभान्वित हुने उनले बताए । रत्ननगर नगरपालिकाका उपमेयर विमला दुवाडीले धर्मधाममा धार्मिक पर्यटकीय क्षेत्रसमेत रहेकाले फ्री वाईफाईको सुविधाले पर्यटकलाई सुविधा पुग्ने बताइन् । फ्री वाईफाई शुभारम्भ कार्यक्रममा प्रदेश सांसद्हरु कृष्ण खनाल, कञ्चन खनाल, वडाध्यक्षहरुलगायत स्थानीयबासीको सहभागिता रहेको थियो ।
रत्ननगर यसअघि मोबाईल एप्समार्फत ४० वटा फिचरको माध्यमबाट नगरका सम्पूर्ण गतिविधि थाहा पाउने प्रविधिको विस्तार गरिसकेको छ । त्यस्तै नगरपालिकालाई पेपरलेस बनाउन सम्पूर्ण वडलाई दैनिक पत्राचार र सञ्चार इमेलमार्फत जोडिएको, अनलाईनमार्फत घर नक्सापासको व्यवस्था मिलाइएको, व्यक्तिगत घटना दर्ता र सामाजिक सुरक्षालाई अनलाईन प्रणालीबाट लागू गरिएकोलगायतका कार्य सञ्चालनमा रहेको नगरपालिकाका सूचना तथा प्रविधी अधिकृत रवि तिवारीले बताए ।
खैरहनीमा ध्वनी सूचना पाटी
खैरहनी नगरपालिका कार्यालयले सूचना प्रविधिमैत्री नगर बनाउने क्रममा ध्वनी सूचना पाटी (अडियो नोटिस बोर्ड ) को सुरुआत गरेको छ । सो बोर्डमार्फत नगरपालिकाका हरेक सूचना सरोकारवालाले आवाजमार्फत सुन्न सक्नेछन् ।
नगरपालिकाले सोमबारदेखि यो प्रविधिको विस्तार गरेको प्रमुख प्रशासकीय अधिकृत पुरुषोत्तम शर्माले जानकारी दिए । सूचनाका लागि १६१८०५६५८२८८५ नम्बर डायल गर्नुपर्ने हुन्छ । सामाजिक सञ्जाल र पत्रपत्रिकाको पहुँचमा पुग्न नसकेका नगरबासी तथा नगरपालिका कार्यालयसम्म नपुगी सूचना थाहा पाउन ध्वनी सूचना पाटीले सहयोग पुग्ने शर्माले बताए ।
नगरपालिकाले यसअघि ग्रुप एसएमएस सिस्टमबाट सूचना तथा चिठी पठाउने, घटना दर्ता अनलाईनमार्फत गर्ने, खैरहनी–१ क्षेत्रमा पर्ने पूर्व–पश्चिम राजमार्गमा सीसीटिभी क्यामेरा जडान गर्ने काम गरिसकेको नगरपालिकाका सूचना तथा प्रविधि अधिकृत सुरेश चौधरीले जानकारी दिए ।
